Komemora Levantamentu Mehara 1983
Xefe Suku Mehara Husu Estadu Prezerva Istoria

By Bebiana A.M. Soares | 1531 Views 08 Ago 2020, 01:01:57 HTL Istoria
Xefe Suku Mehara Husu Estadu Prezerva Istoria

Caption: Familia Vitima Levantamentu Mehara 08 Agusto 1983 (Photo: Bebiana A.M. Soares | LALATAK.COM).


“Ba oin hakarak produz ona sira nia istoria, no lansamentu ba loron ida ne’e sai hanesan loron nasional istoriku 8/08. Nune’e husu Assosaisaun Vitima, no parseiru Centro Nasional Chega!I.P elabora istoria sira.”

Deklarasaun ne’e hato’o hosi Xefe Suku Mehara, Postu Tutuala, Munisipiu Lautem, Ze Meigo Neto, iha enseramentu atividade seminariu komemorasaun loron Levantamentu Mehara 08 Agostu 1983, iha Mehara, Sabadu (07/08/20).

Autoriedade lokal ne’e ekresenta, levantamentu 08 Agusto 1983 mak akontesimentu ida ne’ebé rezulta ema barak mate no lakon familia, ne’ebé komunidade sira iha tempu ne’ebá ho espiritu nasionalismu responde orden Comando da Luta hodi prontu terus no mate ba libertasaun patria, ne’ebé rai hela sentimentu triste ba komunidade iha fatin refere.

Nutisias Relevantes:

Iha fatin hanesan, Vice Presidente Asosaisaun Konsellu Veternaus Postu Administrativu Tutuala Eurico dos Santos do Rosario hateten, “hahu hosi 2003, kuandu sobrevivente sira konta sira nia istoria ita rona, ita mós sente kontente,” maibé nia parte sente triste tanba sente Estadu la rona no sente sira nia sofrimentu.

Entretantu, reprezentante Administrador Munisipiu Lautem Lino Ferreira iha sesaun enseramentu atividade refere hateten, “ba maluk sira ne’ebé mak ohin la konsege fo sai sira nia istoria ita sei iha tempu, istoria ne’ebé mak seidauk kompletu, fanun ita para bele fo hanoin hodi kompleta iha tempu oin mai.”

Relasiona ho komemorasaun loron istoriku ne’e, Xefe Suku Mehara Ze Meigo Neto salienta, hahu hosi 2003 - 2013 komunidade komemora loron istoriku refere, maibe iha tinan hirak liuba la kontinua tanba laiha fundus, nomos desintendimentu iha elabora ideias ba istoria refere. Autoriedade lokal ne’e subliña foin primeria vez hetan ajudus hodi bele organiza eventu ne’e.

“Ohin liu husi organizasaun Assosaisaun Vitima, servisu hamutuk ho autoridade lokal suku Mehara ho komunidade sira, hetan apoiu finanseiru hosi Centro Nacional Chega!I.P (Centro Chega!) realiza hikas komemorasaun ne’ebé paradu tiha iha tinan hirak liu ba kotuk,” tenik Xefe Suku Mehara.

Atividade seminariu neé partisipa hosi sobreviventes, familia matebian sira, Autoridade Lokal Munisipiu Lautem, reprezentante Diretur Ezekutivu Centro Chega! ho kometiva, Asosiasaun Vitima, Komando PNTL Munisipiu Lautem, MSSI, Conselho das Cobatentes dos Veteranos, konfisoens relijiozas, komunidades Mehara, joven no estudantes.

Tuir planu sei iha missa no kari aifunan iha loron 08/8/2020. Kustu ba komemorasaun ne’e apoia hosi Centro Chega! ho montante US$1,500.00, ho kategoria orsamental transferensias públikas.* | Editor: Martinho Moniz




Write a Facebook Comment

Hakerek ita nia komentariu uza account Facebook

View all comments

Write a comment

Loading....


Kanan - Iklan Sidebar

Lalatak Sosmed

Hare ami iha facebook, twitter, Instagram, Youtube para akompanha informasaun atual.