Trajedia Balibo, Hahalok Asasinatu Rejime Militar Indonesia

By Basilio Madeira | 689 Views 23 Out 2020, 01:44:27 HTL Politika
Trajedia Balibo, Hahalok Asasinatu Rejime Militar Indonesia

Caption: Laureadu Nobel da Paz Jose Ramos Horta, partisipa iha talk show ho tema “45th anniversary, Remembering the Balibo Five” realiza iha Eskola Internasional Dili (Foto: Basilio Madeira | LALATAK.COM).


Jornalista estranjeiru nain 5 neébe mate iha Balibo, iha fulan Outubro 1975, tinan 45 liu ba tanba hetan oho hosi rejime forsa militar Indonesia, Jose Ramos Horta reafirma.

Laureadu Nobel da Paz kasu lia hirak neé wainhira partisipa iha talk show ho tema: “45th Anniversary, Remembering the Balibo Five”, realiza iha Dili International School, Praia dos Coqueiros, Dili, Quinta-feira (22/10/20).

“Hanoin fila fali momentu tristeza ne’ebe akontese tinan 45 liu ba. Jornalista sira neé mate hanesan sidadaun ida. Sira mate tanba oho hosi rejime forsa militar. Ami hamutuk ho sira iha fulan Outubro 1975 liu ba, iha Balibo,” Horta relembra.

Nutisias Relevantes:

Horta hatutan, nia mos akompaña desde uluk toó ohin loron, oinsa lalaok no reasaun administrasaun Australia hodi hare ba sira nia sidadaun jornalista sira neébe mate.

Entretantu Tim Blackman, mestri lian Ingles iha eskola refere expresa ninia sentimentu, jornalista sira ne’e sakrifika-an, fo sira nia moris ba Timor-Leste. Sira reprezenta jornalista no media ne’ebe livre no independente, laos deit iha rezistensia, maibe iha tempu agora mos.

Eventu talk show neé realiza hodi fo honra no relembra fila fali jornalista nain lima neébe mate iha Balibo, iha tinan 1975, Tim Blackman realsa.

Jornalista nain lima neé mak Greg Shackleton (29) no Tony Stewart (21) hosi Australia, Gary Cunningham (27) hosi Nova Zelandia, Brian Peters (24) no Malcolm Rennie (29) hosi Inglatera. Sira halo kobertura ba Televizaun Channel 7 no Channel 9 Australia.

Ate a data Indonesia sempre nega ba hahalok asasinatu militar Indonesia neé no hateten, jornalista nain lima neé mate tanba apañadus (terjebak) iha batalla entre forsa FRETILIN no UDT momentu neéba.* | Editor: Bebiana A.M Soares




Write a Facebook Comment

Hakerek ita nia komentariu uza account Facebook

View all comments

Write a comment

Loading....


Kanan - Iklan Sidebar

Lalatak Sosmed

Hare ami iha facebook, twitter, Instagram, Youtube para akompanha informasaun atual.