Tinan 2022, Microsoft Sei Hamate Internet Explorer

By Metodio Caetano Moniz | 436 Views 23 Mai 2021, 05:58:01 HTL Teknolojia
Tinan 2022, Microsoft Sei Hamate Internet Explorer

Caption: Logo (icon) Internet Explorer, web browser antigu hosi Microsoft.


Liu hosi sítiu blogs.windows.com, Microsoft anúnsia iha loron 19 Maio 2021 katak sira sei hamate suporta ba aplikasaun Internet Explorer iha tinan oin, loron 15 Junho 2022, no rekomenda ba utilizador atu uza sira nia web browser foun, Microsoft Edge, ne’ebe sira reklama katak lalais no seguru liu, nomos modernu liu kompara ho Internet Explorer.

Ba jerasaun hirak ne’ebe uza komputador ba asesu internet iha periodu 1990 to’o inísiu tinan 2000 la estranhu ho browser internet hosi Microsoft ne’e, Internet Explorer. Hahu lansa iha tinan 1995, hamutuk ho Sistema Operasaun (SO) Windows 95, aplikasaun ida ne’e hetan susesu bot.

Momentu ne’eba, antes Internet Explorer hosi Microsoft, iha ona browser internet seluk hanaran Netscape Navigator. Ho ninia prezensa, Internet Explorer loke dadaun dalan hodi hamate ninia advesariu ne’e, nomos domina no monopóliu merkadu virtual iha inísiu tinan 2000. Iha tinan 2002 Internet Explorer domina merkadu kuaze 95%.

Nutisias Relevantes:

Ho susesu ne’e, Microsoft haluha-an tiha hodi falha halo inovasaun ba aplikasaun ne’e durante tinan lima nia laran. Ida ne’e halo kliente (utilizador) barak mak frustradu, Internet Explorer versaun 6 (IE6) identíku ho bugs, problemas seguransa, no teknolojia mak dezatualizada.

Maske Microsoft atualiza duni aplikasaun ne’e iha tinan 2006 ho IE7, maibe konfiansa hosi utilizador sira mihis ba dadaun. Situasaun ida ne’e loke dalan ba Google Chrome no Firefox hodi hadau Internet Explorer ninia dominasaun.

Nune’e mos, mesmu Microsoft konsege atualiza versaun IE11 iha tinan 2013, maibe la konsege ganha fila fali konfiansa, tanba iha momentu mak hanesan Google Chrome no Firefox mais inovativu no avansadu liu tan, no browser internet sira seluk mos mosu bar-barak.

Atu nafatin mantein ninia prezensa iha teknolojia internet, iha tinan 2015 Microsoft introduz sira nia web browser foun, hanaran Microsoft Edge. Edge laos versaun atualizasaun hosi Internet Explorer, maibe nudar aplikasaun web browser foun hodi troka Internet Explorer, ne’ebe ninia imajen ladiak ona.

Mundu teknolojia ohin loron avansadu no sofistikadu liu ona, liu-liu iha área teknolojia informasaun, ne’ebe ninia teknolojia sempre halo mudansas iha tempu badak nia laran, hodi parte ne’ebe mak satisfas lalais ho ninia produtu, hare ema seluk laiha abilidade, no la halo inovasaun bebeik, sira sei mate rasik. Internet Explorer lakon iha kompetisaun global tanba ida ne’e.*




Write a Facebook Comment

Hakerek ita nia komentariu uza account Facebook

View all comments

Write a comment

Loading....


Kanan - Iklan Sidebar

Lalatak Sosmed

Hare ami iha facebook, twitter, Instagram, Youtube para akompanha informasaun atual.