Taliban Ukun, Sidadaun Refujia ba Nasaun Seluk

By Metodio Caetano Moniz | 248 Views 22 Ago 2021, 12:26:51 HTL Internasional
Taliban Ukun, Sidadaun Refujia ba Nasaun Seluk

Caption: Refuziadus Afghanistan hein nafatin iha Aeroportu Kabul, Afghanistan para evakua ba nasaun seluk (Foto: Anadolu Agency/Getty Images).


Semana ida hafoin Taliban hadau poder iha Afghanistan, kuaze populasaun rihun 12, kompostu hosi sidadaun estranjeirus, no rezidentes mak haknar iha ajensias internasionais, tradutores, ativista direitus umanus, nomos jornalista, mak halai sai hosi país ne’e hodi evakua ba paízes hirak ne’ebe prontu simu sira.

Ba sidadaun estranjeirus, laiha problema tanba ida-idak fila ba ninia nasaun rasik. Maibe, oinsa ho rezidentes ka sidadaun Afghanistan? Sira atu ba los ne’ebe? Nasaun ne’ebe deit mak prontu simu sira?

Aviaun militar ne’ebe transporta sira sai hosi Kabul, Afghanistan husik hela refuziadu hirak ne’e iha’s Tashkent (Kapital Uzbekistan), Doha iha Qatar, no Islamabad, Pakistan hodi hein atu evakua sira ba nasaun ne’ebe mak prontu simu.

Nutisias Relevantes:

The Guardian (21/08/21) relata, rezidentes Afghanistan balun ne’ebe antes ne’e serbisu ho Estadus Unidus Amerika ka misaun internasional sira seluk, oras ne’e dadaun temporariamente abrigadus iha Albania, Kosovo, no Norte Macedônia, hodi hein prosesamentu ba sira nia viza. Nune’e mos esquemas trânzitu planeadus seluk mak Colômbia, Uganda, no Qatar.

Nasaun ne’ebe deit mak prontu simu refuziadus hosi Afghanistan ne’e?

Estadus Unidus Amerika kompromete ona atu simu refuziadus nain rihun 10 no governu Australia loke odamatan ba refuziadus nain rihun tolu.

Iha fulan kotuk, Tajikistan deklara prontu simu deslokadus nain rihun 100 hosi ninia nasaun viziñu ne’e.

Maske nasaun seluk hatudu sentidu solidariedade, maibe nasaun Europea barak la komprometidu atu simu refuziadus hosi Afghanistan, elemde hirak ne’ebe mak serbisu iha sira nia ajensia.

Atu fo sala ba paízes Europea sira? Labele! Tuir lolos estadu no governu Afghanistan, ho forsa polítika ne’ebe deit mak ukun, iha responsabilidade hodi fo garantia ba sira nia sidadaun atu la tauk moris iha sira nia nasaun rasik. Se prinisipiu no direitu fundamental ida ne’e mos estadu la konsege asegura, Afghanistan laiha ona signifikansia atu existe nudar país soberanu ida iha mapa mundial.*




Write a Facebook Comment

Hakerek ita nia komentariu uza account Facebook

View all comments

Write a comment

Loading....


Kanan - Iklan Sidebar

Lalatak Sosmed

Hare ami iha facebook, twitter, Instagram, Youtube para akompanha informasaun atual.