Spyware Pegasus, Mau-Hu Israel Via Telemovel

By Metodio Caetano Moniz | 577 Views 31 Ago 2020, 02:08:36 HTL Teknolojia
Spyware Pegasus, Mau-Hu Israel Via Telemovel

Caption: Figura ilustrasaun Pegasus, spyware sofistikadu hosi Israel (Fontes: www.kaspersky.com).


Ahmed Mansoor, ativista direitus umanus Uni Emirates Arab (UEA) sempre simu SMS hosi entidade deskoñesidu. Nia deskonfia! Ahmed envia mensajen neé ba espesialista seguransa tekonolojia informátika iha Citizen Lab. Hamutuk ho kompania seguransa sibernétika Lookout, konsege deteta spyware hanaran Pegasus, hosi Israel, neébe infekta telemóvel, iOS ka Android sem detetada.

Toó ohin loron, sita hosi inet.detik.com, Domingo (30/08/2020), faktus hatudu katak kuaze ema nain 1,400 mak sai ona vitima ba atakes pegasus. Tanba neé, Facebook – nain ba Whatsapp – foti prosesu hasoru NSO Group, kampañia Israel neébe produz spyware neé.

“Pegasus projetada para intersepta komunikasaun mak envia ka simu hosi despozitivus (gadget), inkluindui komunikasaun através iMessage, Telegram, WeChat, Facebook Messenger, WhatsApp, no selseluk tan,” WhatsApp eskreve iha sira nia komunikadu.

Nutisias Relevantes:

Públika atraves sítiu Kaspersky, kompania seguransa sibernétika Lookout rekoñese atakes hosi pegasus neé sofistikadu tebes no sira nunka hare durante neé.

Lookout hatutan, pegasus hanesan malware modular. Hafoin deteta alvu, nia automatikamente instala modul nesesaria iha alvu nia telemóvel, no hahu asesu ba email, SMS, iMessage, Telegram, WeChat, Facebook Messenger, WhatsApp, no selseluk tan. Simplesmente, pegasus nudar mata-mata hodi halao servisus espionajen ba alvu nia vida tomak.

Parte interessante seluk hosi pegasus mak nia sei harahun-an rasik bainhira ninia server komandu no kontrolu la simu resposta durante loron 60.

Hatan ba atakes neé, Apple toma asaun rapidamente. Empreza neé lansa kedas iOS security update versaun 9.3.5, neébe korije vulnerabilidades iha sira nia produtu, iPhone no iPAD.

Google, parte neébe involve mos iha prosesu investigasaun toma medida seluk, fo hatene direktamente ba parte neébe ninia telemóvel infektada ona ho pegasus. Kuandu ita update ona ba sistema operasaun Android foun, no la simu mensajen hosi Google, signifika provavelmente ita seguru no livre hosi pegasus ninia vijilânsia.

Maibe, maske nuneé labele fiar-an katak ita livre ona hosi atakes malware no spyware seluk, Kaspersky alerta.

Tanba neé, nesesaria atu update ita nia sistema operasaun telemóvel regularmente, instala solusaun seguransa (e.q. antivírus) hosi empreza koñesidu, nomos lalika asesu (klik) ba link neébe haruka ba ita hosi parte deskoñesidu, Kaspersky rekomenda.*




Write a Facebook Comment

Hakerek ita nia komentariu uza account Facebook

View all comments

Write a comment

Loading....


Kanan - Iklan Sidebar

Lalatak Sosmed

Hare ami iha facebook, twitter, Instagram, Youtube para akompanha informasaun atual.