Selebridade: Laos Deit Bonita, Maibe Matenek Mos

By Metodio Caetano Moniz | 518 Views 26 Mai 2021, 01:46:04 HTL Divertimentu
Selebridade: Laos Deit Bonita, Maibe Matenek Mos

Caption: Felicya Angelista ho ninia laen Immanuel Caesar Hito (Foto: instagram.com/felicyangelista_).


Maske definisaun konaba “bonita” laos buat ne’ebe absoluta, imposivel atu kalkula ho formula matemátika no teoria exata ruma, maibe públiku laiha debates no “konkorda” katak mundu selebridade nakonu ho artista, liu-liu feto, ne’ebe bonita, famoza, no zeitoza deit.

Iha parte balun hateten, verdadeira bonita laos deit hare hosi fiziku, maibe hatetuk mos ba ema nia laran. Ida ne’e signifika tenki iha inner beauty, katak hatudu atitude diak no iha konhesimentu naton bainhira sosializa ka halo interasaun ho ema seluk.

Fator determinante ida, alende fatores seluk, atu hatudu atitude diak mak nivel konhesimentu no edukasaun. Ida ne’e banati ba funsaun hosi edukasaun rasik, ne’ebe atu dezenvolve abilidade, karakter, no sivilizasaun. Ida ne’e mos la ses hosi esénsia hosi edukasaun nudar prosesu hodi “hatasak” kualidade vida (Mulyasa, 2011:3).

Nutisias Relevantes:

Konsiente ba importánsia hosi edukasaun, artista ka selebrity barak mak, maske preokupa ho kareira, nafatin kontinua sira nia estudus, no balun hatudu prestasaun diak teb-tebes, hodi komprova katak sira laos bonita iha aspetu fiziku deit, maibe kakutak mos, hanesan artista na’in lima hosi Indonesia, ne’ebe pasa sira nia estudus ho predikadu cum laude.

(1) Felicya Angelista; moris iha Jakarta, 2 Novembro 1994 lisensiadu ho Cum Laude hosi Fakuldade Jestaun (Management), Universidade Bisnis Nusantara no graduadu iha tinan 2021. Liu hosi ninia Instgram @felicyangelista_ espouza hosi artista Immanuel Caesar Hito ne’e expresa ninia sentimentu kontente.

“Hau so esperu pasa, maibe Nai Jesus (Kristu_Red.) fo predikadu Cum Laude. Ida ne’e tanba grasa hosi Nai Jesus. Obrigadu wain Nai Jesus,” Felicya hakerek.

Iha ninia kareira, Felicya Angelista halimar ona iha filme lubuk ida, hanesan Cinta Dalam Kardus (2013), Marmut Merah Jambu (2014), Will You Marry Me (2019), no Kiko In The Deep Sea (2019), alende sinetron no FTV (Film Television). Nudar kantora, Felicya mos produz ona single tolu Mulai Mencinta (2015), Lain Sekali no Jatuh Cinta Lagi (2016).

(2) Maudy Ayunda; hetan predikadu Cum Laude bainhira lisensiadu hosi Fakuldade Polítika, Filosofia, no Ekonomia, Oxford University. Oras ne’e dadaun nia kontinua hela estudus Mestradu iha Stanford University.

Hahu ninia kareira ho filme Untuk Rena (2006), foinsa’e ne’ebe moris iha Jakarta, 19 Dezembro 1994 ne’e sai estrela iha filme Perahu Kertas (2012), Refrain (2013), Habibie & Ainun 3 (2019), Losmen Bu Broto (2021), no sel-seluk tan.

Nudar kantora, Maudy Ayunda mos produz ona ninia album muzika tolu, Panggil Aku (2011), Moments (2015), no Oxygen (2015), ladauk inklui album soundtrack filme no single lubuk ida. Nia mos hakerek ona livru #Dear Tomorrow: Notes to My Future Self (2018), Kina's Story: Kina and Her Fluffy Bunny no Kina's Story: Kina Makes a New Friend (2019).

(3) Gita Gutawa; graduadu ho predikadu Cum Laude hosi Fakuldade Ekonomia, University of Birmingham iha tinan 2014. Hafoin ida ne’e, nia kontinua kedas programa Mestradu iha Fakuldade Culture & Society, London School of Economics and Political Science, no gradua iha tinan 2015.

Oan feto hosi muziku no kompozitor famozu Erwin Gutawa ne’e moris iha Jakarta, 11 Agostu 1993 no halao profisaun nudar model, estrela sinema, kantor, no kompozitor muzika. Desde halao kareira, nia produz ona album muzika lubuk ida, hanesan Gita Gutawa (2007), Harmoni Cinta (2009), Balada Shalawat (2010), The Next Chapter (2014), Gita Puja Indonesia (2017).

Iha área filmografia, Gita Gutawa involve iha filme Meraih Mimpi (2009) no Love in Perth (2010), nomos halimar iha sinetron lubuk ida desde tinan 2007.

(4) Alyssa Soebandono; Mestradu ho predikadu Cum Laude iha área Corporate Communication hosi London School of Public Relations ne’e halao kareira nudar estrela sinema, model, no presenter, moris iha Jakarta, 25 Dezembro 1991.

Durante halao ninia profisaun, Alyssa Soebandono involve iha filme Petualangan Sherina (2000), Janus: Prajurit Terakhir (2003), no Inikah Rasanya Cinta (2005). Nia mos involve iha sinetron kuaze 20 resin hosi tinan 2003 to’o 2019, no FTV hanesan Rohma Rohim (2013), Antara Aku, Rumah yang Yahud (2014), no Kenapa Cinta Harus Memilih (2017).

Alende filmografia, artista ne’e mos produz single (muzika) Cerita Cinta Kita iha tinan 2013, nomos sai nudar presenter ba programa Berita Islami Masa Kini iha TransTV.

(5) Mikha Tambayong; graduadu ho predikadu Cum Laude iha Fakuldade Direitu, Universidade Pelita Harapan iha tinan 2017. Remata ida ne’e, nia kontinua foti mestradu iha Program International Executive Master of Management iha universidade mak hanesan.

Mikha Tambayong moris iha Jakarta, 15 Setembro 1995 halao ninia profisaun nudar estrela sinema, kantora, no model, ne’ebe hahu involve iha filme Fallin' in Love, iha tinan 2012, kontinua ho filme Slank Nggak Ada Matinya (2013), Check-In Bangkok (2015), Senjakala di Manado (2016), Critical Eleven (2017), no BPJS (Budget Pas-Pasan Jiwa Sosialita) iha tinan 2018. Alende filme, nia mos involve iha sinetron no FTV lubuk ida.

Nudar muziku, Mikha Tambayong konsege produz album Bekas Pacar iha tinan 2010 no single Nada Cinta no Aishiteru iha tinan 2011, Mendung Kan Berganti no Senandung Bumi (2012), Konara (2013), nomos Temukan Jawabannya (2016).

Seluk hosi sira nain lima refere, artista Indonesia ne'ebe akaba sira nia estudus ho predikadu Cum Laude mak Dian Sastrowardoyo (Mestradu iha Universitas Indonesia), Tasya Camila (Mestradu iha área Public Administration, Columbia University), Cinta Laura (Columbia University), Febby Rastanti (Fakuldade Direitu, Universitas Indonesia), no Isyana Sarasvati (Royal College of Music, London).*


Note: informasaun iha artigu ida ne'e kompila hosi fontes media online oi-oin.




Write a Facebook Comment

Hakerek ita nia komentariu uza account Facebook

View all comments

Write a comment

Loading....


Kanan - Iklan Sidebar

Lalatak Sosmed

Hare ami iha facebook, twitter, Instagram, Youtube para akompanha informasaun atual.