PDHJ husu Estajiaria Sira Sai Ambaxador Direitus Humanus no Boa Governasaun

Sekretariu Ezekutivu PDHJ, Ambrosio Graciano Soares husu ba estajiaria sira ne’ebé termina ona sira nia periodu estajiu iha PDHJ, atu sai nafatin ambaxador PDHJ nian hodi promove direitus humanus no boa governasaun.

Lia ne’e Sekretariu Ezekutivu hato’o iha ambitu serimonia despede estudante adminsitrasaun no finansas nain tolu hosi Asosiasaun Hadomi Futuru Naroman ba Timor (AHFMT) ne’ebé termina ona sira nia periódu estajiu iha Provedoria Direitus Humanus no Justisa (PDHJ).

Ambrosio Graciano Soares hato’o obrigadu ba AHFMT ne’ebé fó ona konfiansa ba PDHJ hodi husik estudante sira estajiu iha PDHJ durante fulan rua entre data 14 janeiru to’o 14 marsu 2025.

Dirijente ezekutivu PDHJ ne’e mós hato’o agradese ba estajiariu sira, durante fulan rua estajiu iha PDHJ, aprende no hatene ona kona-ba knar no kompetensia PDHJ, nomós apoiu servisu admintrasaun iha PDHJ. Nune’e Sekretariu Ezekutivu husu, maske estajiu hotu ona, nafatin aprende no sai promotor PDHJ nian, liu-liu sai ambaxador hodi promove direitus humanus no boa governasaun iha Timor-Leste.

“Uit eh barak, ita bo’ot sira aprende ona iha ne’e, husu atu ita bo’ot sira sai ambaxador PDHJ nian hodi haklaken knaar no kompeténsia sira, nomós promove direitus humanus no boa governasaun”, Ambrosio salienta.

Iha fatin hanesan, Diretor AHFMT, Herminio da Costa hato’o agradese tanba PDHJ kopera diak tebes ho AHFMT, no simu ona estudante hosi AHFMT dala rua, hein katak PDHJ sei kontinua simu nafatin hodi halo estajiu iha PDHJ nune’e bele aprende buat barak, liu-liu relasiona ho servisu administrasaun no finansas iha setor publiku.

Diretor AHFMT husu ba estajiariu sira, atu uza lisaun diak sira ne’ebé aprende durante hala’o estajiu iha PDHJ, buat ne’ebé diak, ne’e nu’udar bukae no motivasaun hodi sai ema ne’ebé kualidade.

“Sentru AHFMT no PDHJ gia deit ita bo’ot sira, maibé atu sai ema ne’ebé kualidade ne’e depende ita bo’ot sira,” afirma Diretor AHFMT, Herminio da Costa.

Enkuantu, reprezentante estajiaria Marzinha Maria Marques hato’o agradese wa’in tanba bele hetan oportunidade hodi estajiu iha PDHJ no aprende kona-ba PDHJ nia servisu, liu-liu iha Diresaun Promosaun nomós Gabinete Sekretariu Ezekutivu.

Estajiaria hirak ne’e mak Rabela Florentina Loiola, Lina Afida Mendes, no Marzinha Maria Marques. Sira na’in tolu kursu kona-ba administrasaun no finansas iha AHFMT, no durante halo estajiu iha PDHJ, servisu jestaun rekursu humanu destaka Rabela Florentina Loiola no Lina Afida Mendes iha diresaun promosaun, no Marzinha Maria Marques iha Gabinete Sekretariu Ezekutivu.

Hodi taka serimonia ne’e, PDHJ atribui sertifikadu apresisaun ba estajiaria hirak ne’e. Serimonia despedida ne’e hala’o ohin 14 marsu 2025, iha Biblioteka PDHJ, ne’ebe partispa hosi Sekretariau Ezekutivu, Diretora Promosaun, Diretora Rekursu Humanu, Diretor AHFMT, ofisial sira Gabinete Sekretariu Ezekutivu, Diresaun Rekursu Humanu nomós Diresaun Promosaun.*