Sanggar Santo Antonio, Expo Polemika Iha Dubai

By Metodio Caetano Moniz | 1685 Views 23 Out 2021, 03:07:40 HTL Divertimentu
Sanggar Santo Antonio, Expo Polemika Iha Dubai

Caption: Umbelina C. Alves Correia, ex-membru Sanggar Santo Antonio (Foto: MC. Moniz | LALATAK.COM).


Kostum “Dragon Ball” no Bidu Biti hosi Sanggar Santo António iha ambitu Expo Dubai 2021 sai kontravesu no viral iha mídia sosial, ne’ebe temátiku plagiarism no la reprezenta kultura Timor nian sai hanesan topiku sentral iha debates públiku ne’e, ne’ebe oitoan ka barak polémika ne’e hamosu lisaun ba Domingos Flaviano, Koordenador Sanggar ho ninia membru sira.

Akaba estudus iha area arte hosi ensinu superior ida iha Yogyakarta, Indonesia, Domingos Flaviano (Mito) fila mai Dili, Timor-Leste hodi hamutuk ho grupu koru feto foinsa’e nain 18, lidera hosi Jenifer Sousa funda Sanggar Santo António, lokaliza iha Kampung Alor, Dili ho intensaun atu hamorin naran Santo António no promove kriatividade foinsa’e iha área arte no kultura.

Loron 20 Marsu 2010 sai hanesan pontu de partida (starting point) ba sanggar arte ida ne’e hodi hamosu inspirasaun no inisiativas ba kriatividades mak kristaliza ba bidu oioin ho ilas arte kontemporánea, ne’ebe dalabarak sira nia obra hakahur entre tradisaun no kultura Timor-Leste ninian ho rítmiku modernu, hanesan Bidu Kipas no Bidu Babadok.

Nutisias Relevantes:

Perform publikamente ba dahuluk iha Laclubar, Manatuto tanba hetan konvite hosi Palásiu Prezidensial, desde momentu ne’eba, sira koñesidu no hetan konvite hosi parte oioin, liuliu instituisaun públiku sira hodi aprezenta bidu iha selebrasaun ka komemorasaun iha rai-laran, nomos iha eventus nivel internasional, henesan iha Malaysia, Bali, Australia, no Brazil.

“Maun Joel, ne’ebe serbisu iha Palásiu Prezidensial momentu Sr. Ramos Horta mak nudar Prezidente Repúblika, azuda teb-tebes ami hodi halo promosaun liu hosi mídia sosial,” dehan Umbelina C. Alves Correia, ex-membru Sanggar Santo António ba LALATAK.COM iha Centro Nacional Chega! Dili.

Laos bidu deit, Sanggar Santo António mos sai nudar vensedor primeiru iha eventu karnaval tinan 2013 mak realiza hosi Ministériu Turismu, Komersiu, no Industria (MTCI).

Bidu Biti, ne'ebe hamosu polémika, kria iha tinan 2013 no perform ba dahuluk iha Siméria CPLP tinan 2014 mak realiza iha Dili, no hetan konvite hosi MTCI hodi ba perform bidu ne’e iha Festival Florida, Canberra, Australia, nomos Brazil, iha eventu Siméria CPLP.

Tuir Umbelina, inisiativa no konseitu ba kriasaun Bidu Biti no bidu sel-seluk ne’e mai hosi Mito, nudar Koordenador Sanggar Santo António, maibe nia involve membru sanggar sira atu explora rasik kriatividade hodi hariku ninia gerakan.

“Ezemplu hanesan nia kaer tiha biti ne’e, nia fo tiha ami, oinsa ami atu halo explorasi fali ba biti ne’e,” Umbelina, nudar mos membru Alumni Parlamentu Foinsa’e Timor-Leste ne’e esplika.

Ho prestasaun ne’ebe iha, Sanggar Santo António hetan fiar hosi Sekretaria Estadu Arte no Kultura hodi halo peskiza konaba arte no kultura tradisional iha munisípiu Manufahi, Oe-cusse, no Manatuto.

Infelizmente, iha tinan 2021 Bidu Biti hosi Sanggar Santo António sai viral iha mídia sosial no hamosu kontroversu iha públiku hafoin perform iha Expo Dubai 2021. Parte balu hateten katak bidu ida ne’e hanesan ka halo tuir fali (plágiu) Tari Tikar hosi Pontianak, Kalimantan Barat, Indonesia, ne’ebe uza mos biti hanesan property prinsipal, maske ninia gerakan diferente.

Hatan ba preokupasaun públiku ne’e, nudar ex-membru, Umbelina sente triste. Nia la espera ikus mai Bidu Biti ne’e sai kontraversu. Momentu kria no explora ninia gerakan iha tinan 2013, nia rasik nunka hatene katak Indonesia mos iha bidu ida ho uza property biti.

Maibe labuat ida, Umbelina hatutan, reajen hosi públiku ne’e nudar lisaun ida ba ami, ba Sanggar Santo António hodi kuidadu, buka referensia, no sensivel liu tan bainhira dezenvolve bidu ruma tuir ita nia kultura no tradisaun rasik, ka iha kontextu arte kontemporánea.

Iha ámbitu arte kontemporánea, Wahyudin, kurador (curator) arte ida hosi Yogyakarta, Indonesia hateten, iha métodu artístiku hanaran apropriasaun (apropriasi), ne’ebe disponivel ba artista sira uza forma, téknikas, no ideias hosi artista seluk. Ho lia-fuan seluk, nia dehan, apropriasaun hanesan prátika plájiu ida ne’ebe lejítimu.

Wahyudin fo ezemplu, pintura Monalisa hosi Leonardo da Vinci. Artista Marcel Duchamp iha tinan 1919 halo apropriasaun ba pintura refere hodi aumenta bigode (kumis) no barba (jenggot) nudar elementu paródia (parodi), ne’ebe pintura ho títulu L.H.O.O.Q Mona Lisa With Moustache ne’e ema sosa ho presu fantástiku, no Duchamp la hetan reklamasaun ka akuzasaun konaba prátika plagiarism.

Redasaun LALATAK.COM tenta husu komentáriu hosi Domingos Flaviano sobre polémika ne’e, maibe liu hosi Whatsapp nia informa katak sira prepara hela publikasaun hodi esklarese ba públiku no finaliza tiha mak fo sai dala ida.*




Write a Facebook Comment

Hakerek ita nia komentariu uza account Facebook

View all comments

Write a comment

Loading....


Kanan - Iklan Sidebar

Lalatak Sosmed

Hare ami iha facebook, twitter, Instagram, Youtube para akompanha informasaun atual.