Komemora Levantamentu Marabia
Prezidente Republika Sei Kondekora Saudoza Bi Kiak

By Gil Ximenes Gusmao | 428 Views 08 Jun 2021, 22:57:24 HTL Sosial & Kultura
Prezidente Republika Sei Kondekora Saudoza Bi Kiak

Caption: Sekretaria Jeral Interina Organização Popular Mulher Timorense (OPMT) Florentina M. Smith, akompanha hosi Diretor Ezekutivu Centro Chega! no Kordenador Jeral Komisaun Levantamentu Marabia iha konferensia imprensa mak halao iha Centro Chega! Balide (Foto: LALATAK.COM)


Komemora Levantamentu Marabia 10/06/1980, Prezidente Republika Demokratika Timor-Leste (RDTL) sei kondekora saudoza Merita Alves 'Bi Ki’ak' ho Ordem Timor-Leste, ho títulu póstum, nomós lansa livru ‘Buibere Hamriik Ukun Rasik-an’ nu’udar obra hodi sura kontribuisaun feto iha luta ba ukun rasik-an.

Lia ne’e hato’o hosi Sekretariu Jeral Interina Organização Popular Mulher Timorense (OPMT) Florentina M. Smith, atraves konferensia imprensa mak hala’o iha Edifisiu Centro Chega!, Balide, Dili, Terça-fera (08/06/2021).

Levantamentu Marabia, 10 Juñu 1980 nu’udar loron historiku, ne’ebé FALINTIL lansa atake ba kuartel militar Indonezia Marabia, Dili hodi hatudu ba mundu katak, funu ba Timor nia ukun rasik-an sei existe, ikus mai hamosu Timor-oan barak mak desteradu no mate.

Nutisias Relevantes:

Nune’e, OPMT hamutuk ho entidade relevante sei organiza atividade iha Palasiu Prezidensial Aitarak-Laran, Dili, iha loron 10/06/2021 hosi horas 16:00 – 18:00, hodi relembra loron historiku refere, iha ne’ebé Prezidente RDTL Franscisco Guterres Lú-Olo sei lansa livru Buibere Ham'rik Ukun Rasik-An.

Livru refere hakerek konaba kontribuisaun hotu ne’ebe feto halo ba luta ukun rasik-an, liu hosi frente armada, frente klandestina, no frente esterna ka frente diplomatika.

Iha fatin hanesan, Kordenador Jeral ba Komisaun Levantamentu Marabia hatutan, komemorasaun ne’e hodi relembra ita nia historia. Akontesimentu Marabia mak afirma hikas pozisaun Timor-oan ba luta auto determinasaun ba ukun rasik-an hafoin baze de apoiu rahun.

Nune’e mós Diretór Ezekutivu Centro Chega! Hugo Maria Fernandes akresenta, eventu ne’e laos deit atu komemora aten barani FALINTIL sira, maibé halo mos reflesaun ba impaktu hosi levantamentu ida ne’e, ne’ebé halo ema barak terus, triste no desteradu.

Diretór Ezekutivu Centro Chega! salienta, Timor-Leste iha hela ambitu estadu emerjensia, konfinamentu obrigatoriu, ne’ebé labele halibur ema barak, nune’e sei halo transmisaun direita hosi RTTL, E.P ho durasaun oras rua, nune’e povu tomak bele asiste hosi uma.* Editor: Martinho Moniz | LALATAK.COM




Write a Facebook Comment

Hakerek ita nia komentariu uza account Facebook

View all comments

Write a comment

Loading....


Kanan - Iklan Sidebar

Lalatak Sosmed

Hare ami iha facebook, twitter, Instagram, Youtube para akompanha informasaun atual.