Prezidente no Primeiru-Ministru Mali Renunsia Durante Detidu

By Metodio Caetano Moniz | 415 Views 27 Mai 2021, 06:43:09 HTL Internasional
Prezidente no Primeiru-Ministru Mali Renunsia Durante Detidu

Caption: Prezidente Bah N'Daw momentu detein hosi Junta Militar Mali (Foto: newsrand.com).


Prezidente Bah N'Daw no Primeiru-Ministru Mali Moctar Ouane renúnsia hafoin militar detein sira durante loron rua nia laran iha Quartel-Jeneral Forsas Armadas Mali, tanba exklui Sadio Camara no Modibo Kone hosi kompozisaun governu tranzisional.

Antes halo remodelasaun governu, Sadio Camara okupa pozisaun nudar Ministru Defeza no Madibo Kone nudar Ministru Seguransa.

Ho rezignasaun Prezidente Bah N'Daw no Primeiru-Ministru Mali Moctar Ouane ne’e, loke dalan ba Vice-Prezidente Mali Koronel Assimi Goita hodi asumi no kontrola absolutamente situasaun iha país ne’e.

Nutisias Relevantes:

“Prezidente no ninia Primeiru-Ministru rezigna-an tiha ona. Oras ne’e halao hela nogosiasaun para liberta sira na’in rua no forma governu foun,” informa Baba Cisse, Asesor Koronel Assimi Goita, ba Reuters, Quarta-feira (26/05/2021).

Bah N'Daw no Moctar Ouane asume pozisaun nudar Prezidente no Primeiru-Ministru Mali iha fulan Setembro 2020 hafoin junta militar obriga Prezidente Ibrahim Boubacar Keita rezigna-an hosi ninia pozisaun.

Detensaun ba Bah N'Daw no Moctar Ouane atrai kondenasoens internasionais, inklui hosi Estadus Unidus Amérika, Uniaun Afrikana, Misaun Nasoens Unidas iha Mali, no Bloku Rejional Áfrika Osidental, ECOWAS.

“Estadus Unidus kondena maka’as detensaun lideres sivis governu tranzisaun Mali,” dehan porta-voz Departamentu Negosius Estranjeirus Ned Price.

Ned Price akresenta, sira sei kolabora ho komitê lokal ba monitoramentu tranzisaun no atores internasionais hodi liberta imediata no inkondisional ba detidus no retomada hi’as transizaun iha Mali, ne’ebe liderada hosi sivis.

Entretantu, Prezidente Fransa Emmanuel Macron ba Associated Press (26/05/2021) hateten, nia sei fo sansaun barak liu tan ba Mali tanba Bah N'Daw ninia rezignasaun, ne’ebe nia deskreve detensaun ba lideres tranzisaun nudar golpe estadu.

Gabriel Attal, porta-voz Governu Fransa, dise: "Klaru los ba ami konaba junta: prosesu tranzisaun deve inklui sivis. Deve ser pasífika, deve ser inkluziva, ho durasaun tempu mak sertu. Golpe estadu ida ne’e halakon ona ami nia konfiansa.”

Situasaun instabilidade iha Mali ne’e halo komunidade internasional preokupa, ne’ebe bele dezestabiliza erforsu mak halo ona hodi kontrola insurjênsia (pemberontakan) islâmika mak akontese durante tempu naruk nia laran.

Organizasaun Nasoens Unidas (ONU) tin-tinan gasta US$ 1.2 bilhoens hodi finansia misaun manutensaun paz iha Mali, nomos militar Fransa halo tentativas durante tinan ualu ona para estabiliza situasaun iha ninia país ex-kolônia ne’e.*




Write a Facebook Comment

Hakerek ita nia komentariu uza account Facebook

View all comments

Write a comment

Loading....


Kanan - Iklan Sidebar

Lalatak Sosmed

Hare ami iha facebook, twitter, Instagram, Youtube para akompanha informasaun atual.