PNTL-Manufahi Opta Mekanismu VIP ba Kombate Krime

By Martin Moniz | 469 Views 02 Jun 2021, 12:53:19 HTL Sosial & Kultura
PNTL-Manufahi Opta Mekanismu VIP ba Kombate Krime

Caption: Superintendente Polisia, Comandante PNTL Munisipiu Manufahi Joni Viana das Regras (Foto: www.pntl.tl).


Ba hakotu korente krime no violensia iha munisipiu Manufahi, PNTL Manufahi opta mekanismu Visibilidade, Involvimentu no Professional (VIP). Deklarasaun ne’e hato’o hosi Superintendente Polisia, Komandante PNTL Munisipiu Manufahi Joni Viana das Regras ba LALATAK.COM, Quarta-feira (02/06/21), via telefoni.

LALATAK.COM halo konfirmasaun ho ulun bo’ot PNTL Manufahi ne’e relasiona ho dadus kriminal hosi Polisia Nasional Timor-Leste (PNTL), ne'ebe iha tinan lima ikus (2016-2020) Munisipiu Manufahi mak rejista numeru kazu krime ki’ik liu, kompara ho munisipiu sira seluk iha Timor-Leste.

Joni Viana das Regras akresenta, “ami komunga filosofia ida polisiamentu komunitaria. Entaun mai ho modelu tolu, visibilidade, involvimentu no profesionalismu”.

Nutisias Relevantes:

Visibilidade ba prezensa polisia iha fatin hotu-hotu, aprosimasaun, konvoka enkontru, halo dialogu, hamutuk ho komunidade identifika isu prioridade balun nu’udar mekanismu ne’ebé PNTL Manufahi utiliza hodi buka hamate kedas issue sira ne’ebé liga ba krime no violensia.

Komandante PNTL Manufahi ne’e akresenta, involvimentu katak PNTL la la’o mesak, iha kordenasaun servisu ho autoriedade masimu munisipiu, liñas ministeriais hotu-hotu, nomos komponente naval iha Manufahi ne’ebé hola hotu parte iha seguransa.

“Administrador ho ha’u servisu diak, forte no kredivel teb-tebes, koperasaun ne’ebé diak hosi administrador ho nia estrutura, au mesmu tempu komando PNTL ho nia estrutura to’o iha nivel suku,” tenik Joni Viana.

Entretantu, antes ne’e LALATAK.COM mós publika informasaun konaba asuntu ne’e, ne’ebé Administrador Munisipiu Manufahi Arantes Isaac Sarmento, afirma, ba prevene krime no violensia, Manufahi opta fatuk lalian tolu, ida maka Igreja, Estadu, no Kultura.

Parte hotu servisu hamutuk, fahe informasaun, sensibiliza komunidade ho idaidak nia papel, nune’e komunidade bele iha konsiensia ba kria ambiente paz no hakmatek iha Manufahi.

Purtantu, tipu krime ne’ebé sempre mosu iha Manufahi mak hanesan agresaun fizika simples no disputa rai. Komandante PNTL Munisipiu Manufahi konfirma, durante nia prezensa iha Manufahi grupu arte marsiais ladun iha problema tanba sira mesak mau alin no kolega deit.

Tuir dadus mak iha, munisipiu lima ne’ebé ho numeru kazu krime ki’ik liu mak munisipiu Manufahi, Ainaro, Manatutu, Aileu, no Covalima. Entretantu, munisipiu lima ne’ebé ho numeru kazu krime bo’ot liu mak munisipiu, Dili, Oe-Cusse, Baucau, Liquiça, no Bobonaro.*




Write a Facebook Comment

Hakerek ita nia komentariu uza account Facebook

View all comments

Write a comment

Loading....


Kanan - Iklan Sidebar

Lalatak Sosmed

Hare ami iha facebook, twitter, Instagram, Youtube para akompanha informasaun atual.