PN no VIII-Governu Hahu Debate OJE 2020

By Jesuino Marcal de Jesus | 649 Views 02 Out 2020, 01:38:04 HTL Politika
PN no VIII-Governu Hahu Debate OJE 2020

Caption: Parlamentu Nasional (PN) no VIII Governu hahu debate jeneralidade ba Orsamentu Jeral Estadu tinan 2020 (Foto: Jesuino Marcal de Jesus | LALATAK.COM).


Parlamentu Nasional (PN) no VIII-Governo, iha Uma-Fukun PN, Dili, Quinta-feira (1/10/20) hahu debate jeneralidade ba Orsamentu Jeral Estadu (OJE) tinan 2020 ho karakter urgênjia, hodi normaliza situasaun ne’ebe durante fulan 10 lao ho rejime Duodécimo.

Primeiru Ministru Taur Matan Ruak, iha ninia diskursu hateten, ho orsamentu ida-ne’e no medida sira ne’ebé hala’o hela, sei remata tinan ne’e ho fiar metin katak tinan 2020 mós sei koñesidu hanesan tinan rezisténsia no reziliênsia povu Timor-Leste ninian.

Rezistênsia ne’ebe hahú kedas hafoin akontese surtu Covid-19, atraves programa estabilizasaun ekonómika no sosiál ida ne’ebé ambisiozu, ho pakote estímulu ekonómiku ida ne’ebe kompostu hosi medida konkreta hamutuk sanulu resin, atu hamenus efeitu oioin husi krize ida-ne’e, tenik Taur.

Nutisias Relevantes:

Lider rezistênsia neé akresenta, reziliênsia nian, ne’ebe nia fini sira sei kontinua kari iha fulan sira tuir mai no ninia efeitu sei dada to’o tinan sira tuirmai, inísia ho implementasaun medida hirak ne’ebe propoin hosi planu rekuperasaun ekonómika.

Entretantu iha fatin hanesan, Deputadu Bankada CNRT Arão Noe ba LALATAK.COM hateten, inisiativa hosi VIII Governo ba aprezentasaun OJE 2020 ne’e diak, maibe tuir pareser hosi Komisaun C, iha problema barak mak presiza hadia.

“Hare’e iha problema hanesan hela deit fulan rua ona, maibe nafatin preve osan ba Kapital Dezenvolvimento no Kapital Menor, no osan ne’ebe lolos iha ministériu ida nia parte maibe iha fali ministériu seluk nia parte,” Arão esplika.

Purtantu Deputadu Bankada Fretilin Antoninho Bianco, iha ninia intervensaun hateten, dalan atu normaliza sitausaun ne’ebe lao hela mak ho OGE. Tanba ne’e, nia parte louva VIII Governo tanba bele lori ona orsamentu mai apresenta iha PN.*




Write a Facebook Comment

Hakerek ita nia komentariu uza account Facebook

View all comments

Write a comment

Loading....


Kanan - Iklan Sidebar

Lalatak Sosmed

Hare ami iha facebook, twitter, Instagram, Youtube para akompanha informasaun atual.