Myanmar Simu Konsensu ASEAN Hodi Solusiona Krize

By Metodio Caetano Moniz | 398 Views 25 Abr 2021, 02:38:07 HTL Internasional
Myanmar Simu Konsensu ASEAN Hodi Solusiona Krize

Caption: Lideres politika ASEAN hasoru malu iha Jakarta hodi buka solusaun ba krize iha Myanmar (Foto: www.asean.org).


Lider junta militar Myanmar Min Aung Hlaing, neébe marka prezensa iha ASEAN Leaders’ Meeting mak halao iha Jakarta, Indonesia, Sabadu (24/04/2021), simu konsensu hodi soulusiona krize iha Myanmar, hafoin militar halo golpe iha dia 1 de Fevereiro tinan neé.

Sita hosi Ajênsia Notísias Indonesia, ANTARA (24/04/2021), Primeiru Ministru Singapura no Malaysia informa katak Jeneral Min Aung Hlaing mos la rejeita involvimentu no papel konstrutivu hosi ASEAN hodi azuda Myanmar ultrapasa krize mak hamete ona quaze ema atus ba atus.

Entretantu, lideres polítika ASEAN mak marka prezensa iha enkontru nivel altu ida neé konsege hetan konsesu hodi solusiona krize iha Myanmar; neébe konsiste hosi, imediatamente hapara violensia iha Myanmar no husu ba parte hotu-hotu atu kalma.

Nutisias Relevantes:

Konsensu seluk mak lideres ASEAN husu atu hahu halao diálogu konstrutivu entre partes hodi buka solusaun pasífika ba interese povu, neébe Enviadu Espesial ASEAN mak sei halo mediasaun, suporta hosi Sekretariu Jeral ASEAN ninian.

Lideres ASEAN mos konkonrda atu fornese ajuda humanitária liu hosi AHA Centre, nomos Enviadu Espesial ASEAN sei vizita Myanmar hodi halao enkontru ho partes pertinentes.

Iha deklarasaun hosi Brunai Darussalam nudar Xefia ASEAN tinan 2021, lideres ASEAN hatoó sira nia preokupasaun profunda konaba situasaun iha Myanmar, inklui informasaun konaba ema mate no eskalasaun violensia.

Alende neé, lideres polítika ASEAN subliña no husu atu liberta prizioneirus polítiku, inklui sidadaun estranjeiru iha Myanmar.

ASEAN Leaders’ Meeting neé marka prezensa hosi lideres polítika Indonesia, Vietnam, Singapura, Malaysia, Kamboja, no Brunei Darussalam, nomos partisipa hosi Ministru Negosius Estranjeirus Laos, Thailandia, no Filipina.

Iha parte seluk, semana hirak liu ba, inisia hosi Dr. Jose Ramos Horta no Dr. Dino Patti Djalal, komunidade Aziátiku Sudeste mos halo deklarasaun konjunta hodi husu ba ASEAN atu toma medidas konkretas hodi solusiona krize iha Myanmar.*




Write a Facebook Comment

Hakerek ita nia komentariu uza account Facebook

View all comments

Write a comment

Loading....


Kanan - Iklan Sidebar

Lalatak Sosmed

Hare ami iha facebook, twitter, Instagram, Youtube para akompanha informasaun atual.