Memoria Istoriku Fulan Agustu 1975
Movimentu Armada 11/8 Hasoru Insureisaun Armada 20/8

By Nelson A. Seixas | 901 Views 20 Ago 2020, 06:12:43 HTL Istoria
Movimentu Armada 11/8 Hasoru Insureisaun Armada 20/8

Caption: Aniversariu FALINTIL 20 Maiu 2000 iha Aileu (Photo: www.wikipedia.org)


Hahu ho mudansas situasaun polítika iha Portugal, simu ho espiritu nasionalismu mak kuda no hakiak hela durante períodu kolonializasaun, kahur hamutuk ho analiza politika konaba tendênsia no konjuntura polítika mundial era guerra fria, hafahe Timor-Oan ba faksaun polítika oioin, hamosu funu maun-alin, hodi loke dalan ba invazaun Indonesia, neébe haterus no hamate Timor-Oan rihun ba rihun, antes Timor-Leste restaura hias ninia independênsia.

25 Abril 1974, Exérsitu Portugal neébe baruk ona ho situasaun polítika momentu neéba, lidera hosi Jeneral António de Spínola revolta hasoru Prezidente Salazar, liu hosi asaun hanaran Revolução dos Cravos para hari estadu direitu demokrátiku, katak forsa lolos iha povu nia liman.

Mudansa ne’e fo naroman diak tebes ba nasoens kolonizadas, hosi kontinente África to’o mai Timor-Leste. Timor-oan sira hahu halibur malu iha grupu diskusaun polítika, iha kafetaria Resende, iha lidun no kantu sira iha Liceu, no sikun seluk iha Dili laran. Tópiku diskusaun la ses hosi konstelasaun, tendênsia no konjuntura polítika mundial, liuliu mak akontese iha Portugal. Situasaun neé hatudu katak foinsaé sira, momentu neéba, maske moris ho difikuldade oioin, maibe la izola-an hosi sivilizasaun mundial.

Nutisias Relevantes:

Hosi kafetaria, sikun, no lidun balun iha Dili laran, foinsaé sira kontinua diskuti livre iha âmbitu amigável, konaba ideolojia, faksaun no movimentu polítika iha África, Indo-Cina, no jeralmente Ásia, no impaktu guerra fria (perang dingin) ba nasaun kolônia sira. Prosesu no dinâmika iha diskusaun laran hatudu duni foinsaé sira nia kualidade dialétika hodi atualiza situasaun. Rezultadus hosi diskusaun hirak neé, bele dehan influênsia tebtebes sira nia tendênsia no afiliasaun polítika iha loron oin.

Grupu diskusaun polítika hahu hatudu-an bainhira estudantes nain hitu - Abílio Araújo, Guilhermina Araújo, António Carvarino, Vicente Manuel Reis, Roque Rodrigues, Rosa “Muki” Bonaparte no Venâncio Gomes da Silva - fila hosi sira nia estudus iha Portugal, iha fulan Setembro 1974. Prezensa no involvimentu estudantes hirak neé iha grupu diskusaun hariku liu tan ângulu analiza ba situasaun polítika momentu neéba, liuliu konaba influênsia polítika esquerda iha mundu, hamatan ba ideologia Marxismu, Maoismu, no Leninismu.

Nugroho Kajtasungkana, istoriador no ativista direitus umanus, ba LALATAK.COM tenta ilustra situasaun momentu neéba, neébe ho idadade nurak, kuaze 20 e tal, foinsaé sira hahu halo diskusaun para analiza dinâmika konstelasaun polítika internasional, hodi tenta dezeña Timor-Leste nia futuru.

“Foinsaé sira nia diskusaun neé hatudu fenómenu intelektual tanba sistema edukasaun momentu neéba neé tuir sistema edukasaun osidental (barat) nian. Hanesan sira eskola iha Liceu, iha nivel 6 ano sira estuda ona konaba teoria klásiku, katak sira aprende ona filosofia antigu hosi Aristóteles no Platô. Entaun, sira laos aprende deit konaba prátiku, maibe estuda ona konaba debate ideia iha enkuadramentu sientífiku,” Nugroho esplika. Ida ne’e mak hamosu intelektualidade jerasaun momentu ne’eba, hanesan iha Europa iha tinan 1960, nia hatutan.

Diskusaun Kafetaria ba Movimentu Polítika

Maske diskusaun grupu foinsaé hirak neé, momentu neéba enquadra iha kontextu sientífiku, maibe divergênsia hahu mosu, entre foinsaé lubuk ida mak mai hosi família neébe servisus iha administrasaun kolonial Portugal (grupu elite) ho grupu foinsaé hirak neébe moris hosi família agrikultor ka populasaun baibain (grupu nasionalista). Grupu elite sira haketak-an ona hosi diskusaun kafetaria, no difini sira nia-an iha liña ka sistema polítika orientadu ba sosial-demokrata.

Iha parte seluk, grupu nasionalista foti dalan radikal, kontra ukun kolonialista. Ida neé hatudu iha sira nia asaun, mai ho sira nia analiza ba mudansas polítika ho baze Marxismu, neébe dignifika traballador no agrikultor sira nudar naín ba produsaun. Nuneé mos grupu ida neé halo analiza bazeia ba teoria Maoismu no Leninismu, organiza povu neébe moris iha situasaun explorasaun nia laran durante tinan atus hat resin.

Diverjênsia polítika entre movimentu polítika sira sai pior no hare malu matan lamos liu tan bainhira Reprezentante Governu Portuges iha Timor-Portugues hatudu sira nia apoia polítika ba liu movimentu anti komunista.

Situasaun neé sai agravadu, inserteza governativa kolonial Portugues hamosu insatisfasaun no instabilidade polítika iha rai laran, halo ema Timor lakon esperansa. Hatan ba situasaun neé, la lori tempu naruk, movimentu polítika sira nakfilak ba partidu polítika ho intensaun para lidera povu Timor sai hosi ukun kolonialismu.

Nune’e Iha dia 11 Maio 1974, Timor-oan lubuk ida neébe pertense no kolabora ho kolonial Portugues harii partidu União Democrática Timorense (UDT). Liu tiha loron 10, iha dia 20 Maio 1974 grupu nasionalista sira harii Associação Social-Democrata Timorense (ASDT), neébe la lori tinan refunda asosiasaun ne’e ba Frente Revolucionária de Timor-Leste Independente (FRETILIN).

Ho prezensa partidu polítiku rua ne’e, tensaun polítika hetok manas liu tan. Diverjênsia polítika laos sai deit dialétika hodi defini prinsípiu no dalan ba independênsia, maibe monu ona ba aktu violênsia wainhira partidu bo’ot rua ne’e lansa propaganda hodi hatun malu, hala’o asaun protestu iha fatin-fatin, ne’ebe lori grupu/movimentu filiadus sira hahu tata hena ba malu. Klima polítiku tama iha situasaun inserteza no konfuzaun nia laran.

Faksaun polítika bot rua ne’e expresa sira nia propaganda. UDT lansa Movimentu Armada Anti Komunista, ho lema “Abaixo Comunista.” FRETILIN lansa asaun anti-propaganda, ho lema “Abaixo Traidores, Uma Vez Traidor Sempre Traidores.” Fraze propaganda hirak neé hafutar didilolon iha kantu no sikun sira, iha Dili laran.

Maske tensaun, konfuzaun no inserteza polítika railaran manas liu tiha, maibe tentativas no esforsu hodi realiza sorumutu entre movimentu polítika rua ne’e lao nafatin. Tenta diskuti forma koligasaun, tetu risku para hamosu dalan diak ida hodi hakotu moris nudar kolónia Portugal nian ida iha Ázia. Nuneé, FRETILIN no UDT konsege forma koligasaun iha dia 21 Janeiro 1975 ho kompromisu ba independênsia total, rejeita integrasaun ho Indonesia, no forma governu tranzisional ida mak involve elementus hosi faksaun polítika bot rua neé.

Maibe, inisiativa ida ne’e naksobu iha 27 Maio 1975, wainhira UDT hakotu koligasaun ho FRETILIN, hafoin delegasaun UDT, lidera hosi Franscisco Lopes da Cruz, fila hias mai Dili husi sira nia vizita ida ba Jakarta, iha fulan Abril 1975. Move polítika neé halo situasuan sai la kontroladu, lori povu Timor tama iha konflitu maun-alin. Eis líder UDT Domingos Oliveira rekoñese ida neé, hanesan sita iha relatóriu CAVR, “maioria absoluta desidi dada-an sai hosi koligasaun, hakotu koligasaun… Maibe, ida neé erru bot ida, tanba wainhira ami hakotu koligasaun, situasaun sai pior liu tan.”

Husi Ne’e, Funu Maun-Alin Hahu

Koligasaun UDT ho FRETILIN naksobu ona. Nuneé, iha kalan bo’ot, horas 23:00 hanesan ne’e, Movimentu Armada Anti Komunista (MAAK) hala’o operasaun hanaran “Operasaun SAKONAR”, komanda husi Komandante Xefi João Carasacalão, ho intensaun atu dezarma Polísia Português iha Quintal-boot no duni sai Timor-oan radikal sira hosi Dili, neébe iha loron 11 Agustu 1975, MAAK konsege hadau Kuartel Polísia Português iha Quintal-Boot, Dili, no hasai kilat husi Polísia Português sira, ne’ebe lidera husi Koronel Maggiolo Gouveia, nudar mos apoiantes ba MAAK.

MAAK mos konsege okupa área estratégiku sira seluk iha Dili laran, hanesan Emisora-Farol, Marabia, Terminal Radio, Central Eletricidade, Central Telefónica, Reservatório de Agua, Aeroporto, Porto, Palácio do Governador, Radio Naval, Cônsul da Indonésia, Cônsul da Cina, Sede FRETILIN iha Quintal-boot, Dili, no uma lideransa FRETILIN sira nian, Messe da Oficiais, Messe de Sargento, Kuartel Polísia Militar, DSM, DSB, no CCS/QG.

Husi operasaun ne’e kaptura no detein kuadrus no militantes FRETILIN lubuk ida, inklui Membros Comité Central da FRETILIN, hanesan Xanana Gusmão no Borja da Costa, iha edifísiu Partidu UDT nian, iha Palapaso, Dili.

Movimentu UDT ida neé atu hatudu mos ba Indonesia katak Timor-Português laos knuk ba ideolojia Komunismu atu moris. Ida ne’e mensiona iha karta ne’ebe Francisco Lopes da Cruz no João Carasacalão, iha 12 Setembru 1975, haruka ba Governador Timor Indonesia nian hodi husu apoia ba Governador El Tari tanba MAAK hetan ona reasaun hosi Forças Armadas da Libertação Nacional de Timor Leste (FALINTIL) - FRETILIN ninian.

Situasaun inseguru ne’e monu ona ba aktu violentu. Timor-oan lakon tiha nia néon. Dinâmika diskusuan polítika luron-ninin nakfilak sai horror iha ema hotu nian ulun. Asaun violensia hadaet ona ba munisipiu hotu-hotu iha Timor laran tomak. Husi ne’e, funu maun-alin hahu. Maun-alin deskonfia malu, maun no alin duni malu no tara malu, haluha ona ninia kultura, mout no lakon iha polítika manipulasaun kolonial ninian.

Asaun Movimentu Armada Anti Komunista obriga FRETILIN muda ninia Sede Komite Sentral ba Aileu, iha los área Asirimou. Ikus mai, fatin ne’e sai hanesan fatin detensaun no sai fatin ba polítika Reabilitasaun Nasional (RENAL), hodi dadur UDT nia ema, nomos ema hirak neébe la konkorda ho polítika FRETILIN ba ukun rasik-an total no imediata.

Liu tiha loron sanulu, iha loron 15 Agustu 1975, iha Aileu Komite Sentral FRETILIN anúnsia “recomeço da luta geral armada contra todos os traidores e inimigos do povo” (hahu luta jeral armada hasoru traidores no povu nia inimigu sira), hodi halibur forsa boot ida atu defende no proteze ninia polítika lolos ba Independência Total e Completa.

Nuneé, ho forsa armada hanaran FALINTIL, FRETILIN lansa insureisaun armada iha tuku 1:00 madrugada, iha loron 20 Agustu 1975, hodi responde asaun hosi movimentu armada anti komunista ne’ebe lansa husi UDT. Insureisaun armada neé konsege hadau Kuartel Jeneral Exérsitu iha Taibesi, Dili, no detein mos tropas Português sira, inklui Vice-Chefe do Estado Maior.

Iha fulan Agustu nia rohan no inísiu fulan Setembru 1975, FRETILIN hahu dadur no halo torturasaun ba UDT nia ema lubuk ida, nudar act of revenge (aksi balas dendam) ba hahalok violasaun neébe UDT hatudu uluk ona durante halao movimentu armada anti komunista.

Rezultadu hosi insureisaun armada 20 Agustu 1975, iha fulan Setembru FRETILIN domina tiha ona teritoriu Timor-Leste tomak no kontinua estabelese estrutura governasaun nian to’o aldeia, hodi iha loron 28 Novembro 1975, FRETILIN unilateralmente proklama Independensia Timor-Leste.

Iha funu maun-alin ida ne’e, haktuir relatoriu CAVR, hamate ema kuaze 3,000 (rihun tolu), Governador Kolonial Português halai sai husi Dili ba Atauru iha fulan Agustu 1975 nia rohan, hodi kontinua ba Darwin, Australia, para fila ba nia rai moris fatin, Portugal. Nuneé mos lider partidu UDT sira, hamutuk ho partidu kiik tolu: Associação Popular Democrática Timorense (Apodeti), Klibur Oan Timor Aswain (KOTA), no partidu Trabalhista hakat liu fronteira Timor-Leste ho Indonesia, no hahu prosesu husu integrasaun ho Indonesia.

Funu maun-alin neé mos nudar kanalizador no katalizador ba konkretizasaun ambisaun teritorial Indonesia, desde uluk, para invade Timor-Leste. Nuneé, iha fulan Outubru 1975 militar Indonesia intensiva atividades infiltrasaun mai iha teritoriu Timor-Leste, hodi iha fulan Novembro 1975 reprezentante partidu UDT, hamutuk ho partidu kiik Apodeti, Trabalhista no KOTA asina deklarasaun ida ne’ebe Indonesia sira prepara feitu ona iha hotel Paneda View, Bali, hanaran Deklarasaun Balibo, hodi integra Timor-Leste sai Provínsia 27 Indonesia nian.

Ikus mai, iha loron 7 Dezembro 1975, dader-san, Indonesia invade Timor-Leste hodi hahu kampaña teror no intimidasaun ho hahalok barbarian durante tinan 24, hamosu trajédia umanidade iha era sékulu-21, hamate kuaze ema 200,000 (rihun atus rua), ho apoiu no iha kedan paízes defensores direitus umanus nia matan-laran. Trajedia neé rai hela legadu sofrimentu no situasoens traumátikas ba Timor-oan sira toó ohin loron, iha era Timor-Leste Ukun Rasik-An, hafoin restaura ninia independênsia iha loron 20 Maiu 2002.* | Editor: Metodio Caetano Moniz


Artigu ida neé hakerek ho referensias: Relatoriu CAVR; Relatorio do Governo, Timor-Portugues, 1974; Escola da Vida, Paixau, Xanana Gusmao; no Pledoi Pembelaan Francisco Branco Miranda.




Write a Facebook Comment

Hakerek ita nia komentariu uza account Facebook

View all comments

Write a comment

Loading....


Kanan - Iklan Sidebar

Lalatak Sosmed

Hare ami iha facebook, twitter, Instagram, Youtube para akompanha informasaun atual.