Indonezia, Trajedia Timor-Leste Repete iha Papua Osidental?

By Metodio Caetano Moniz | 416 Views 12 Mai 2021, 08:01:39 HTL Internasional
Indonezia, Trajedia Timor-Leste Repete iha Papua Osidental?

Caption: Grupu solidariedade Papua Osidental exije ba Prezidente Indonezia hodi retira label terorista ba ema Papua (Foto: jubi.co.id).


“Populasaun rihun ba rihun mak halai sai hosi Distritu Puncak, populasaun hosi suku lima halai ba ai-laran. Sentru saude no eskola sira okupadu hosi militar. Tropas Indonéziu espalladu iha fat-fatin. Ami hela iha zona da guerra,” dehan Lanikwe, lider feto ida hosi Wamena ba The Guardian.

Victor Mambor, jornalista proeminente hosi Papua Osidental mos sai alvu ba atakes hodi estraga tiha nia kareta, hafoin nia halo reportajen konaba profesores nain rua hosi Distritu Puncak ne’ebe mate tanba hetan tiru iha fulan Abril liu ba.

Ba The Guardian Victor Mambor hateten, reportajen mak hatun iha ninia mídia, tabloid jubi (jubi.co.id) konaba profesores nain rua mate ne’e diferente ho mídia Governu ninian, ne’ebe so públika deit versaun hosi militar no polísia Indonézia.

Nutisias Relevantes:

Veronica Koman, Advogada Victor Mambor afirma, asidente ne’e akontese tanba ninia reportajen konaba situasaun iha Distritu Puncak, hotspot hosi konflitus mak akontese dadaun.

“Ida ne’e nudar episódiu asédiu kontra jornalista Papua. Kuandu públika informasaun mak kontraria ho versaun governu, ita sei hetan atakes,” hateten Veronica Koman ba The Guardian.

Ho akontesimentu ne’e, The Guardian relata, prátika violensia iha Papua Osidental oras ne’e dadaun halo jornalista no ativista sira sai alvu, Indonézia mos blokeia hotu koneksaun internet, no populasaun barak halai ba ai-laran.

Situasaun ne’e akontese bainhira Indonézia haruka militar bar-barak ba Papua Osidental hafoin Tentara Pembebasan Nasional – Organisasi Papua Merdeka (TPN-OPM) tiru mate Komandante Intelijênsia Militar Indonézia iha Papua Osidental, Brigadeiru Jeneral Gusti Putu Nugraha iha fulan Abril liu ba.

Indonézia halo reazen maka’as hasoru insidente ne’e.

Prezidente Joko Widodo informa ba mídia Indonézia katak nia haruka ona forsas-armadas hodi duni tuir no kaer rebeldes hirak ne’e. Entretantu Bambang Soesatyo, Ketua MPR husu ba governu atu elimina uluk sira, pois mak koalia konaba direitus umanus.

Iha parte seluk, sita hosi mídia jubi.co.id (11/05/2021), grupu solidariedade estudantes, foinsa’e, no povu Papua Osidental iha Distritu Manokwari inzisti Prezidente Indonéziu Joko Widodo atu revizar imediatamente desizaun hodi klasifika Tentara Pembebasan Nasional – Organisasi Papua Merdeka (TPN-OPM) nudar grupu terorista.

Exijensia ne’e sira hato’o atraves diskursu abertu mak halao iha Universidade Papua (UNIPA), Manokwari, Segunda-feira (10/05/2021) semana ne’e.

Frits Alom, koordenador asaun hateten, fo label terorista ba TPN-OPM sei afeta ba hamate espasu demokatiku ba ema sivil sira, liu-liu ba indíjenas Papuas hodi expresa sira nia opinioens ba públiku konaba situasaun injustisa mak akontese dadaun.

“Ami nia asaun ohin loron ne’e neutru no independent, la hali’is ba grupu rezitênsia Papua ka ba militar Indonézia. Ami husu deit atu governu halo revizaun no retira imediatamente label terorista hosi Papua,” nia hatutan.*




Write a Facebook Comment

Hakerek ita nia komentariu uza account Facebook

View all comments

Write a comment

Loading....


Kanan - Iklan Sidebar

Lalatak Sosmed

Hare ami iha facebook, twitter, Instagram, Youtube para akompanha informasaun atual.