India: Rekupera Hosi COVID-19, Mate Tanba Mucormycosis

By Metodio Caetano Moniz | 411 Views 24 Mai 2021, 03:54:22 HTL Internasional
India: Rekupera Hosi COVID-19, Mate Tanba Mucormycosis

Caption: Pasiente mucormycosis iha India. Rekupera hosi COVID-19, mate tanba Mucormycosis (Foto: www.srilankatimes.lk).


“Infesaun black fungus (jamur hitam) lori ameasas bot liu fali COVID-19. Se pasiente la hetan tratamentu lalais ho apropriadu, ninia nivel letalidade (daya bunuh) bele atinji 94%. Kustu ba tratamentu karun, no suplementu aimoruk limitadu,” dehan Dr. VP Pandey, Xefe Departamentu Medisina Hospital India ba BBC, Domingo (23/05/2021).

Ladauk ultrapasa trajédia mortalidade umana rihun ba rihun tanba COVID-19, India hasoru tan epidemia seluk ne’ebe ninia letalidade liu fali COVID-19, hanaran mucormycosis, ne’ebe afeta ona kuaze ema na’in 8,800 ho taxa mortalidade 50%, no balun bele salva so ho hasai pasiente nia matan.

Hare ba ninia propagasaun ne’ebe lalais liu no kuaze hadaet ona teritóriu tomak, India deklara moras ne’e nudar epidemia. Iha Hospital Maharaja Yeshwantrao, Indore, númeru pasiente mucormycosis hosi na’in 8 iha semana kotuk aumenta ba 185 to’o loron Sábado semana kotuk.

Nutisias Relevantes:

“80% pasiente tenki halo lalais operasaun. Tinan kotuk so iha kazu ida ka rua deit,” informa Dr. VP Pandey ba BBC.

Nia hateten, sira tenki sona (injesaun) pasiente mucormycosis lor-loron ho aimoruk antifúnjika (anti jamur) Amfoterisin B durante semana ualu. Iha aimoruk oin rua: Amfoterisin Deoxycholate Standar no Amfoterisin Liposomal.

Dr. Pandey kontinua, nia halibur ona dadus hosi pasiente nain 201, ne’ebe rekupera ona hosi COVID-19. Maioria rekuperadu ho tratamentu steroid, no hirak ne’ebe antes ne’e sofre diabetes mak fasil atu hadaet hosi mucormycosis.

Estudus mak halao hosi dotor nain hat hosi India hatudu katak hosi pasiente COVID-19 nain 100 mak hadaet ona ho mucormycosis, nain 79 mane, no nain 83 mak antes ne’e sofre moras diabetes.

Estudus seluk mak halao ba pasiente mucormycosis nain 45 iha Hospital Mumbai deskobre katak sira sofre diabetes ka diagnóstiku sofre diabetes bainhira lori mai ospital. Sira hotu-hotu ho nivel kadar gula darah mak as.

“Laiha pasiente mucormycosis mak ninia kadar gula darah normal,” dehan Akshay Nayar, dotor serurjiaun matan mak halo tratamentu ba pasiente hirak ne’e.

Sita hosi fontes oi-oin, mucormycosis nudar infesaun ida ne’ebe kauza hosi expozisaun fungus (jamur) mukosa mak mai hosi rai, ai-horis, estrume (pupuk kandang), ai-fuan, modo-tahan no ai dodok sira. Fungus ne’e infetada ba ema liu hosi respirasaun no kanek iha isi-lolon.

Mucormycosis afeta ba sinus, sérebru (otak), pulmaun (paru-paru), no lori ameasa bot ba ema ho moras diabetes, kânker, no ba ema ho moras HIV/SIDA, ka ba ema ne’ebe ninia imunidade menus.

Bainhira hadaet hosi moras ida ne’e, sintomas mak mosu hanesan isi-manas no ulun-moras. Kuandu espalha ona ba sérebru no pulmaun sei hamosu konvulsoens (kejang-kejang), paralizia (kelumpuhan), pneumonia, no bele halo pasiente mate.

COVID-19 no mucormycosis, moras ne’ebe hadaet lalais ho letalidade as, nomos sempre hadaet ba ema ho imunidade menus no antes ne’e sofre ona comorbid. Kuidadu-an rasik hodi haforte sistema imunidade iha isi-lolon nudar maneira efetivu liu hodi kontra moras hirak ne’e. Iha referensia bar-barak mak esplika konaba mentein sistema imunidade, hanesan konsumu ai-han ho vitamina no mineral sufisiente hanesan brokoli, bayam, lis-mutin, ai-fuan, sea-food, yoghurt, no sel-seluk tan, nomos halo exersisiu desportivas regularmente, deskansa sufisiente, no labele stress.

Alende ne’e, asoens preventivas mos bele halo dadaun através kuidadu ambiente mak hijiêniku, hanesan halo limpeza regularmente, hadok-an hosi rai-rahun, hakoi ka sunu ai-horis, ai-fuan, no modo-tahan hirak ne’ebe dodok ona, hadok-an hosi lixu animal, kuidadu isi-lolon labele kanek, nomos ba hirak ne’ebe sofre diabetes ka moras seluk mak hamenus imunidade tenki halo tratamentu regularmente.

Timor-Leste ninia kondisoens ambiental favoravel teb-tebes atu infetadu ho mucormycosis. Tanba ne’e, deve ser antisipa dadaun atraves asoens preventivas, ka bainhira akontese Timor-Leste preparadu ona, la hakfodak. Esperiensia hasoru surtu COVID-19 sai nudar “lalenok” ba Timor-Oan hotu-hotu, hodi kontinua prátika hirak ne’ebe diak ona, melhoria hirak ne’ebe ladauk diak, no hamosu buat ne’ebe ladauk iha.

Ita la imajina, COVID-19 hosi Wuhan, China bele espalha ba mundu tomak, inklui Timor-Leste. Ita mos labele optimista katak mucormycosis so akontese iha India, sei la mai to’o Timor-Leste. Iha tempu mak hanesan, ita mos labele pesimista! Fiar metin nafatin katak Timor-Leste, no Timor-Oan sempre ultrapasa problemas no dezafius oi-oin mak nia hasoru, iha situasaun saida deit.*


Note: Atu hatene konaba detalhes asoens preventivas ba mucormycosis bele hare rekomendasaun hosi Center for Disease Control and Prevention (CDC), Estadu Unidus Amérika através link ne’e.




Write a Facebook Comment

Hakerek ita nia komentariu uza account Facebook

View all comments

Write a comment

Loading....


Kanan - Iklan Sidebar

Lalatak Sosmed

Hare ami iha facebook, twitter, Instagram, Youtube para akompanha informasaun atual.