Governu Aprova Medidas Mitigasaun ba Impaktu Krize Ekonomika

By Metodio Caetano Moniz | 792 Views 31 Jul 2020, 07:41:02 HTL Ekonomia
Governu Aprova Medidas Mitigasaun ba Impaktu Krize Ekonomika

Caption: Palasiu Governu Republika Demokratika Timor-Leste (Photo: gpm.gov.tl)


Governu Timor-Leste, atraves Konsellu Ministrus aprova ona medidas kurtu prazu hodi hatan ba krize ekonomika mak afeta hosi pandemia COVID-19, neébe aprezenta hosi Komisaun Elaborasaun Planu Rekuperasaun Ekonomiku (KEPRE), lidera hosi eis Ministru Finansas Rui Augusto Gomes, iha Dili, Quarta-feira (29/07/2020).

Haktuir ba komunikadu neébe publika iha sitiu ofisial Governu ninian, apezar hosi medidas mak Governu foti ona durante periodu Estadu Emerjensia konsege kontribui para asegura postu servisus no apoiu empreza sira, nomos konsege mantein nivel konsumu traballadores no sira nia familia, maibe nesesariu atu mantein ka kria medidas foun iha tinan 2020 hodi satisfas sidadaun sira nia nesesidades bazikas, mantein postu servisus barak liu tan hodi asegura rendimentu familiares, suporta traballadores seitor privadu no seitor informal sira seluk, nomos mantein numeru emprezas iha merkadu.

Komunikadu neé mos hatutan katak Governu sei toma medidas hat hodi rekupera ekonomiku iha tempu badak. Medida ba dahuluk mak atribuisaun "cesta basica", neébe sei fornese ai-han ho nutrisaun nesesariu, nomos produtu limpeza no hijiene ba familia hotu-hotu. Objetivu bot hosi medida ida neé mak apoiu nesesidades bazikas ba familia iha pais ida neé, kontribui ba kombate hamlaha no vulneravilidades iha area neébe kiak no izoladu, nomos fornese apoiu ba agrikultores, produtores, no komersiante lokais hodi insentiva oferta lokal no garantia produsaun.

Nutisias Relevantes:

Medida ba daruak mak fasilita subsidiu mensal ba emprezariu hirak neébe halao nafatin sira nia atividades ekonomiku, partikularmente atividades hirak neébe relasiona no dependenti ba seitor turismu, hanesan hotel, travel agency, no kompania aereas, ho objetivu hodi apoia rekuperasaun ekonomiku, ajuda sira iha kustu fixu hanesan salariu, rendas no impostu, ka sel-seluk, nomos investimentu kiík nesesariu ba sira nia atividades ekonomiku.

Dispensa pagamentu seguransa sosial mak aplika dadaun hanesan medida ba datolu hosi politika rekuperasaun ekonomiku neé. Medida ida neé sei haluan no reformula ba fulan nen tuir mai, hasae liquidez (liquidity) empregador sira, ho maneira halo eliminasaun temporaria ba pagamentu seguransa sosial.

Hatetuk ba situasaun traballadores seitor privadu no ema hirak neébe servisu iha seitor informal, medida ba dahat mak konsesaun subsidiu extraordinariu 60%, ho kondisoens sira rejista ona nudar kontribuente ba sistema seguransa sosial iha periodu Julho - Setembro 2020.

Seluk hosi medidas hirak neé, KEPRE mos sei aprezenta rekomendasaun ba Konsellu Ministrus medidas seluk mak sei aprova no implementa iha tinan 2021.

Hafoin faze estabilizasaun ekonomia, neébe inisia tiha ona durante Estadu Emerjensia no faze rekuperasaun ekonomika, espera kresimentu ekonomiku sei hahu iha tinan 2022, haktuir komunikadu refere.

KEPRE simu tomada de posse hosi Primeiru Ministru Taur Matan Ruak iha loron 18 Junho 2020 ho responsabilidade, iha loron 60 nia laran rekomenda ba Konsellu Ministrus medidas nesesarias para rekuperasaun ekonomia nasional. Membru komisaun kompostu hosi Rui Augusto Gomes nudar prezidente, ho vogais nain hat: Rui Maria de Araujo, Carlos da Silva Lopes Saky, Manuel Vong, no Berta Montalvao.*




Write a Facebook Comment

Hakerek ita nia komentariu uza account Facebook

View all comments

Write a comment

Loading....


Kanan - Iklan Sidebar

Lalatak Sosmed

Hare ami iha facebook, twitter, Instagram, Youtube para akompanha informasaun atual.