Funu: Kaderiza Lider Futuru ho Mental Traumatizadu

By Metodio Caetano Moniz | 599 Views 22 Mai 2021, 08:46:34 HTL Internasional
Funu: Kaderiza Lider Futuru ho Mental Traumatizadu

Caption: Foto ilustrasaun: Labarik feto iha ahuk-desan funu entre Israel ho Palestina (Foto: www.aljazeera.com).


Israel no Palestina aseita halo sesar fogu, Sexta-feira (21/05/2021) hafoin akontese konflitu armada durante loron 11, ne’ebe hamate kuaze ema nain 243, inklui feto no labarik nain 100 iha Gaza, nomos hosi parte Israel ema nain 12 mak mate, inklui labarik nain rua, relata BBC News (22/05/2021).

Hanesan akontese iha rai bar-barak, labarik sira - alemde feto - sai nudar grupu ne’ebe vulneravel liu no sempre sai vitima iha kualker konflitus. Labarik barak mak mate, kanek, difisiente, no balun hela iha situasaun profundamente traumatizadu.

Durante tinan 10 ikus, humanium.org relata, kuaze labarik rihun 10 mak mate iha funu laran, tanba deit ema bot sira nia intereses ne’ebe expresa ho hahalok bárbaru (biadab) no cruel (kejam), haluha ka halo finzi la hatene konaba labarik sira nia direitus fundamentais.

Nutisias Relevantes:

Organizasaun Nasoens Unidas (ONU) ratifika ona Konvensaun konaba Direitu Labarik (Convention On The Rights of The Child) iha loron 20 Novembro 1989 tama entrada em vigor iha loron 2 Setembro 1990, hodi proteje no defende labarik sira nia direitu.

Haktuir ba konvensaun refere, labarik sira iha direitu ba protesaun; proteje labarik sira hosi prátika diskriminasaun, explorasaun, exploitasaun, violénsia, no neglijénsia. Nune’e mos labarik sira iha direitu ba moris, direitu ba dezenvolve-an liu hosi edukasaun, no direitu ba partisipasaun.

Maske nasaun barak mak ratifika ona, implementasaun hosi konvensaun ne’e bele dehan laiha “nehan”. ONU rasik, nunka toma medidas konkretas bainhira akontese violasaun ba direitus labarik, so “apelu, lamenta, kondena”. Nasaun hirak ne’ebe ratifika ona mos so kontinua deit ho asuntus tekniku administrativus, kontempla iha normas juridikus nasionais, estabelese komisaun nasional, no sel-seluk tan.

Faktus ikus hosi funu Israel – Palestina hatudu ida ne’e. ONU no nasaun sivilizadu sira so “apelu, lamenta, no kondena”. Labarik, hamutuk ho sira nia familia rasik mak halo esforsu no tentativas oi-oin para salva-an iha situasaun chaos ne’e.

Atu hatene situasaun labarik iha konflitu armada entre Israel – Palestina, BBC ba hasoru Nadeen, labarik feto ida hosi Gaza, no Edan, labarik mane ida hela iha Moshav Dekel, Israel hodi rona konaba sira nia experiensia hasoru aktus violentus iha funu ida ne’e (video kompletu hare iha ne’e).

“Hau la konsege akalma alin mane ne’ebe sente tauk. Ami rona explozoens, labarik sira hakilar hodi husu azuda, no inan hirak ne’ebe tanis tanba sira nia oan. Hau mos sente tauk,” dehan Nadeen, labarik feto ho idade tinan 10, hosi Gaza, Palestina ba BBC.

Sentimentu tauk ne’e hau tenta subar. Hau lakohi nia sente hela ho situasaun inseguru iha Gaza tanba ida ne’e mak ami nia uma lolos. Nia tenki sente katak nia seguru hela iha ninia uma rasik, hateten Nadeen, labarik feto ne’ebe hela ho ninia inan-aman ho maun-alin nain lima durante konflitu.

Nadeen hatutan, hau nia inan-aman preokupa ho sira nia oan. Hau ho maun-alin sira seluk preokupa ba malu. Maibe, ami tenta hamutuk nafatin.

“Bainhira tempu to’o para mate, ami sei mate hamutuk. Ida ne’e mak diak liu ona tanba ami sei hasoru no hela hamutuk nafatin iha lalehan, Nadeen expresa ho triste, atraves video ne’ebe publika hosi BBC.

Hosi lidun seluk, Edan, labarik mane ho idade tinan 11, hela ho ninia inan-aman iha Moshav Dekel, Israel, hateten, bainhira rona “Code Red” no sirene lian, sira halai no ba subar iha abrigu laran.

“Hau hela deit iha ne’e durante tempu konflitus. Kuandu rona sirene lian, hau sente tauk no halai buka moris. Tenta haluha tiha situasaun ne’e ho maneira halo buat seluk mak halo hau sente kontenti, hodi hein tempu ne’e ultrapasa lalais,” Edan hatutan.

Ho sasin hosi labarik nain rua ne’e, nota katak la iha parte seluk, ONU ka nasaun ne’ebe deit, inklui sira nia lideres polítikus rasik mak hamutuk, no hamaluk sira iha situasaun defisil nia laran. Labarik ida-idak, hamutuk ho familia, halo tentativas oioin para subrevive, ultrapasa situasaun ne’ebe kria hosi ema ambisiozu, bárbaru no cruel sira.

Dala ida tan, situasaun funu, alemde lori konsekuensias lakon vida, halo labarik sira, jerasaun futuru, nudar fini ba ukun-na’in hela iha situasaun traumatizadu no insertu. Oinsa ita bele produz lideres ne’ebe diak para lori sivilizasaun ba mundu se sira nafatin aprende hosi ita nia hahalok bárbaru no cruel ne’e? Eransa diak saida mak ita rai hela ba sira?*




Hare Video:


Write a Facebook Comment

Hakerek ita nia komentariu uza account Facebook

View all comments

Write a comment

Loading....


Kanan - Iklan Sidebar

Lalatak Sosmed

Hare ami iha facebook, twitter, Instagram, Youtube para akompanha informasaun atual.