Estudantes UNTL Husu Komunidade Konserva Sia Maria

By Gil Ximenes Gusmao | 642 Views 02 Mar 2021, 10:52:05 HTL Turismu
Estudantes UNTL Husu Komunidade Konserva Sia Maria

Caption: Estudante ho Autoridade lokal no komunidade hasai retratu hamutuk hafoin aprezentasaun rezultadu peskiza. | Foto: LALATAK.COM (27.02.2020)


Lagoa Sia Maria situada iha Suku Vatu-Vou, Postu Adminsitrativu Maubara, komunidade fatin refere uza lagoa ne’e hodi hetan rendimentu ekonomiku atraves atividade peskas. Purtantu ikus-ikus ne’e autoriedade no komunidade fatin refere transforma lagoa Sia Maria Maubara nu’udar ekoturizmu.

Ekoturismu Sia Maria dada eh atrai turista lokal nomós internasional barak ba pasa sira-nia tempu livre iha bee lihun refere. Entratantu fatin ne’e dada mós atensaun komunidade akademiku nian hodi buka hatene ekosistema iha bee lihun ne’e.

Nune’e, estudante nain 12 hosi Departamentu Pescas e Ciencia Marinha, Faculdade Agricultura, Universidade Nasional Timor Lorosa’e (UNTL)  iha loron 24/02/2021 halo peskiza iha fatin refere hodi identifika pontensia lagoa Sia-Maria.

Nutisias Relevantes:

Objetu hosi atividade peskiza ne’e mak haree moris ekosistema oi-oin, ekolojia, makro bentos sira nia fertilidade, nomós makro-zoobentos nia moris bazeia ba kadeia hahan iha lagoa refere.

Purtantu estudante sira konsege identifika problema balun hanesan ai-parapa mate, manu imigrantes menus ne’ebé afeta ba paisajem iha lagoa refere. Nune’e, rekomenda atu prezerva sasan moris hirak ne’e, hodi bele garante sustentabilidade esplorasaun potensia hosi lagoa refere.

Lia ne’e tatoli hosi Dosente orientador peskiza Abilio Fonseca, PhD iha Aldeia Raime, Suku Vatu-Vou, Postu Administrativu Maubara, Municipiu Liquiça, perante aprezentasaun rezultadu peskiza ne’e ba autoriedade sira, loron Sabadu (27.02.2021).

Hamatan ba rezultadu peskiza ne’e, membru komunidade Gustavo Rodrigo nu'udar peskador akresenta, sira sei servisu hamutuk ho parte hotu hodi proteje biodiversidade sira mak moris iha lagoa refere.

Gustavo afirma, relasiona ho ema abandona ka husik hela redi ikan (pukat) iha lagoa laran, grupu joven no autoridade lokal fatin refere esforsu hodi tau matan ba lagoa refere atu ema labele ba kaer ikan iha lagoa laran ne'ebe konservadu.

Iha fatin hanesan, Xefe Suku Vatu-Vou Gabriela da Costa Pereira Jeronimo hato'o sentimentu kontente relasiona ho aprezentasaun rezultadu peskiza refere, ne’ebé fó hanoin komunidade no autoriedade fatin refere ba prezerva no/ka konserva potensia naturais mak iha.

"Ami kontente ho prezensa estudante UNTL iha lagoa Sia Maria Maubara, hodi fo hanoin mai ami atu kontinua kuidadu no jere didiak rekursu ne’ebe mak ami iha, atu hamutuk ho komunidade hodi konserva lagoa refere," tenik ulun komunidade ne’e.

Lider komunitaria ne’e espera parte hotu nafatin disponivel atu servisu hamutuk ho sira hodi prezerva, konserva no promove rekursu naturais sira hodi bele kontribui rendimentu ekonomiku ba komunidade no nasaun.

Estudante departamentu pescas e ciencia marinha Juleta Nunes de Oliveira hateten, atividade peskiza ne’e aumenta tan sira nia koñesimentu konaba mangrove ka ai-parapa, tanba durante ne’e aprende deit teoria iha aula.* | Editor: Martinho Moniz




Write a Facebook Comment

Hakerek ita nia komentariu uza account Facebook

View all comments

Write a comment

Loading....


Kanan - Iklan Sidebar

Lalatak Sosmed

Hare ami iha facebook, twitter, Instagram, Youtube para akompanha informasaun atual.