Estudante Nain Hat Konklui Estudu iha FSE-UNTL

By Bonifacio A. Correia | 2040 Views 31 Ago 2020, 09:15:49 HTL Sosial & Kultura
Estudante Nain Hat Konklui Estudu iha FSE-UNTL

Caption: Judisiariu nain hat foto hamutuk ho Dekanu FSE hafoin remata seremonia judisium (Photo: Bonifacio A. Correia | LALATAK.COM).


Estudantes nain hat hosi Fakuldade Siensia Exata (FSE), UNTL, Willibrodus Usfinit no Avênancia Tavares iha area kímika, nomos Joana Belo no Claudina Pereira iha area matemátika, halo judisium hodi hetan grau lisensiadu, iha salaun INFORDEPE, Balide, Dili, Sabado (29/08/20).

Antes neé iha tinan 2019 sira nain hat kontinua estudus espesializada iha Universidade de Aveiro, Portugal no konsege finaliza iha tinan ida neé.

Dekanu FSE Samuel Freitas haktuir, fakuldade edukasaun forma ema atu hanorin ema. FSE forma ema ho kompeténsia multidimensional ka transversal, neébe bele atua area hothotu mak iha ligasaun ba matemátika, fízika no kímika.

Nutisias Relevantes:

Manorin ne’e deklara, produtu FSE bele haknaar iha area investigasaun sientifika nomós industria transformadores no/ka industria produsaun sira hanesan bee moos, alimentasaun no seluk tan.

“Iha matematika bele servisu iha banku, diresaun estatistika. Fizika bele servisu iha aseguradores, muzeu, no kímika bele servisu iha laboratoriu no fatin ne’ebe bele akomoda sira,” tenik dekanu.

Dekanu FSE Samuel Freitas enkoraja estudante sekundariu sira atu estuda iha area refere tanba iha Timor-Leste rekursu iha área ne’e menus tebes.

Judisiariu Willlbrodus Usfinit ba LALATAK.COM hateten, “depois-de akaba estudu, klaru ha’u buka fali moris foun. Universidade produz ita ho produtu ne’ebe universidade fo hodi tun ba merkadu traballu.”

Williboridus akresenta, ho matenek no koñesimentu ne’ebe iha, nia sei buka empreza no/ka voluntariu iha fatin ruma hodi aumenta nia esperensia no koñesimentu, oinsa bele aplika buat ne’ebe aprende ona hosi FSE iha industria no sosiedade ne’ebe presiza.

Willibrodus realsa, durante tinan lima aprende ho belun barak, maibé ikus mai konsege finaliza estudu ho belun nain hat, inklui nia. Nia konta, iha FSE la aprende deit siensia, maibe aprende modellu moris, oinsa bele rezisti.

Purtantu, reprezentante familia graduadu Venansio Tavares afirma, ema ida atu susesu tenke mai hosi nia hakarak no haka’as-an rasik. Hetan tan tulun hosi profesor sira, ho inan no aman nia apoiu mak sei hetan susesu.

Fakuldade Siensia Exata (FSE) nu’udar fakuldade ida iha Universidade Nasional Timor Lorosa’e (UNTL), hahu iha fevereiru 2015, ho departementu siensia ezata, nia abilitasaun iha matematika, fizika no kímika ho lian instrusaun Portugés.

Serimonia ne’e hetan partisipasaun hosi Pro-Reitor UNTL, dosente FSE, familia graduadu, reprezentante hosi Fundu Dezenvolvimentu Kapital Umanu (FDCH, sigla Portugés), ANAA, Empreza Gota, Empressa Agua de Portugal, inklui konvidadus sira.* | Editor: Martinho Moniz




Write a Facebook Comment

Hakerek ita nia komentariu uza account Facebook

View all comments

Write a comment

Loading....


Kanan - Iklan Sidebar

Lalatak Sosmed

Hare ami iha facebook, twitter, Instagram, Youtube para akompanha informasaun atual.