Empase Politika no Covid-19 Hamonu Pouzada Maubisse

By Pedro de Deus | 686 Views 02 Out 2020, 00:07:31 HTL Ekonomia
Empase Politika no Covid-19 Hamonu Pouzada Maubisse

Caption: Pouzada Maubisse (Foto: Pedro De Deus | LALATAK.COM).


Empase polítika implika ba kondisaun ekonomia rai-laran durante tinan rua ikus, neébe sai pior liu tan ho propagasaun surtu Covid-19. Situsaun neé hamosu dezafius ba empreza hirak ne’ebe investe iha atividades negósiu hodi sustenta ema nia moris.

Problema ne’e afeta mos ba Pouzada Maubisse, nudar fatin deskansa ba turista estranjeiru no lokal hirak neébe vizita no pasa ferias iha fatin refere mak partense ba Munisípiu Ainaro.

Hosi ninia hela fatin iha Bidau Santana, Dili, atraves telefone, Bella Galhos, jestor Pouzada Maubisse, ba LALATAK.COM, Quinta-feira (01/10/20) hateten, durante tinan rua ikus ne’e Pouzada Maubisse nia rendimentu tun makas los tanba akontese empase polítika no propagasaun surtu Covid-19.

Nutisias Relevantes:

Bella salienta liu tan katak rendimentu mak sira hetan la sufisiente hodi sustenta funsionárius ne’ebe serbisu iha fatin refere, no dalaruma uza osan privadu hodi rezolve situasaun ne’e.

“Mesmu la iha rendimentu, hau la iha hanoin atu hapara sira. Se hasai sira, sira atu ba iha ne’ebe? Hau dehan ba sira ita lalika hasai malu, ita ajuda malu deit atu mantein hodi aseguru fatin ne’e,” Bella Afirma.

Iha sorin seluk, Leonor Magno nudar traballador ne’ebe serbisu iha Pouzada Maubisse hateten, durante implementasaun Estadu Emerjênsia ne’ebe obriga ema hotu labele halo atividade, pouzada mos hapara ninia atividades tuir orientasaun hosi dirijente.

Hafoin situasaun lao normal, pouzada mos hahu loke fila fali hanesan baibain, maibe la fo rezultadu diak tanba la hetan númeru vizitante hanesan baibain, antes de empase polítika no surtu Covid-19, Leonor informa ba LALATAK.COM iha Pouzada Maubisse, Quarta-feira (30/9/20).

Servidor ne’e esplika liu tan katak iha sitausaun normal, kada semana bele hetan rendimentu hosi US$900.00 to’o US$ 1,200.00. Maibe, ho númeru vizitante ne’ebe menus, dala ruma hetan deit US$400.00 ka menus hosi montante ida neé.* | Editor: Bebiana A.M. Soares




Write a Facebook Comment

Hakerek ita nia komentariu uza account Facebook

View all comments

Write a comment

Loading....


Kanan - Iklan Sidebar

Lalatak Sosmed

Hare ami iha facebook, twitter, Instagram, Youtube para akompanha informasaun atual.