dr. Odete: Bebe Infetadu COVID-19 Durante Prosesu Partus

By Metodio Caetano Moniz | 407 Views 30 Mai 2021, 19:44:08 HTL Sosial & Kultura
dr. Odete: Bebe Infetadu COVID-19 Durante Prosesu Partus

Caption: dr. Odete Silva Viegas (parte kuana), Adjunta Kordenador Forsa Tarefa Prevensaun Mitigasaun, Centro Integrado Gestão de Crise - CIGC (Foto: twitter.com/MdSTimorLeste).


Ladauk iha evidensia sientifika ruma mak hatudu katak virus COVID-19 hada’et ba bebé durante sei iha inan nia isin-lolon (grávida). Risku hada’et ne’e so durante prosesu partus.

Lia hirak ne’e kasu hosi dr. Odete Silva Viegas, Adjunta Kordenador Forsa Tarefa Prevensaun Mitigasaun, Centro Integrado Gestão de Crise (CIGC) ba LALATAK.COM via WhatsApp, Domingo (30/05/2021), relasiona ho kazu bebé na’in ida detetadu pozitivu COVID-19.

“Ba inan isin rua ne’ebe partus, sientifikamente posibilidade bebé atu hetan COVID ne ki’ik, maibe sei iha risku nafatin,” Odete hateten.

Nutisias Relevantes:

Beb’e nain ida hosi na’in 17 ne’ebe partus iha Vera Cruz, Odete hatutan, bele kosidera infetadu hosi virus COVID-19 durante prosesu partus normal.

Antes ne’e, através Komunikadu Imprensa, Quinta-feira (27/05/2021), CIGC informa katak bebé na’in ida detetadu pozitivu COVID-19, moris liu hosi partu normal iha fasilidade izolamentu Vera Cruz, Dili, hosi inan mak pozitivu COVID-19.

Nudar públika ona iha LALATAK.COM (28/05/2021), hosi bebé nain 17 ne’ebe mak moris hosi inan detetadu pozitivu COVID-19 iha fasilidade izolamentu Vera Cruz, bebé na’in ida infetadu hosi virus COVID-19, ho Cycle Threshold (CT) N2Gene 18.2.

Hosi lidun seluk, iha Suésia, iha fulan Marco 2021, sita hosi mídia suara.com (03/03/2021), médiku sira identifika kazu bebé infetadu virus COVID-19 momentu sei iha inan nia isin-lolon. Inan ne’e mos detetadu pozitivu COVID-19.

Médiku sira deteta katak bebé ne’ebe ladauk moris, ninia frequência cardíaca (detak jantung) baixu teb-tebes, nudar indikasaun katak bebé ne’e la simu oxijêniu sufisiente.

Ekipa médika halo operasaun sezarina para salva bebé ne’e. Hafoin halo teste ran, nota katak oxijêniu hosi bebé ne’e menus teb-tebes, no bainhira halo teste PCR nia infetadu COVID-19.

“Ami izola bebé hosi nia inan hafoin sezarina, no lahalo kontaktu ho membru família seluk bainhira halao teste. Tanba ne’e ami serteza, bebé infetadu ona antes partus,” informa Mehreen Zaigham, Postdoctoral Research Fellow, Obstetrics & Gynecology, Skane University Hospital, Suésia.

Maske ladauk iha estudus barak konaba bebé infetadu COVID-19 durante periodu grávida, maibe nafatin iha risku hanesan dr. Odete Viegas hateten. Nune’e, ba inan hirak ne’ebe gravida tenki kuidadu-an no prevene atu virus COVID-19 la hada’et.*


Note: kazu seluk bebé infetadu COVID-19 durante periodu grávida bele le'e atraves link ne'e.



Write a Facebook Comment

Hakerek ita nia komentariu uza account Facebook

View all comments

Write a comment

Loading....


Kanan - Iklan Sidebar

Lalatak Sosmed

Hare ami iha facebook, twitter, Instagram, Youtube para akompanha informasaun atual.