Festa do Corpo de Deus
Dom Carlos F.X. Belo: Nai Jesus Prezente Iha Eukaristia

By Metodio Caetano Moniz | 557 Views 03 Jun 2021, 03:28:10 HTL Sosial & Kultura
Dom Carlos F.X. Belo: Nai Jesus Prezente Iha Eukaristia

Caption: Dom Carlos Filipe Ximenes Belo, SDB (Foto: www.beira.pt).


Ohin, loron 3 Junho 2021 Governu desidi nudar loron feriadu nasional, hodi fo biban ba sarani Katólika Timor-Leste selebra festa Corpo de Deus, festa ida ne’ebe realiza hodi hametin nafatin sarani sira nia fiar, katak Jesus Kristu prezente iha óstia no tua ne’ebe Amu-Lulik sira konsagra ona iha selebrasaun Eukaristia.

“Festa do Corpo de Deus mosu iha meadus sékulo XIII. Iha tempu ne'eba ema sarani ladun komunga. Ema balun la fiar katak iha óstia no tua konsagrada Nai Jesus nia prezente,” dehan Dom Carlos Filipe Ximenes Belo, SDB ba LALATAK.COM, Quinta-feira (03/06/2021), via WhatsApp.

Tanba ida ne’e, Dom Carlos hatutan, ho festa ida ne’e Igreja hakarak hametin fali sarani sira nia fiar iha Eukaristia. Atu sarani sira ba Igreja, organiza prosisaun ho Santíssimo Sacramento lao haleu sidade ka aldeia, lori Ostensório no Hóstia, atu ema bele hare no adora Jesus Sacramentado.

Nutisias Relevantes:

Festa Corpo de Deus halao, hodi selebra mos instituisaun Eukaristia no última seia iha loron Quinta-feira Santa.

“Iha loraik Quinta-feira Santa tanba besik ona loron Sexta-feira Santa, Igreja la selebra ho solenidade noite Festa do Corpo e Sangue de Jesus Cristo. Entaun ho loron Festa do Corpo de Deus, Igreja hakarak halo festa bot ho missa solene no prosisaun públika, Dom Carlos esplika.

Eis Bispo Diocese de Dili ne’e salienta, ema ne'ebe dehan sira sarani, maibe la ba missa no la komunga hanesan lolos mate-isin iha kaisaun laran, ne'ebe vadiu hela iha sidade Díli no Baucau laran, defunto ambulante. Hanesan ema moris, ita nia klamar mos presiza ai-han. Ita la komunga, ita nia vida spiritual nam’laik no mate.

“Jesus rasik dehan: ‘see mak han hau nia isin no hemu hau ran, sei hetan moris rohan laek”, Dom Carlos sita hosi Bíblia.

Iha parte seluk, Konsíliu Vatikanu II no Katesismu Igreja Katólika hanorin momos konaba importánsia hosi Eukaristia iha sarani Katólika nia fiar, tanba iha ne’eba, iha “riku-soin” espiritual Igreja ninian ne’ebe própriu, mak Kristu. Purtantu, nudar temi iha 1324, Lumen Gentium 11, Eukaristia konsiderada nudar fonte no vida kristaun ne’ebe as liu.

Atu hakotu, liu hosi LALATAK.COM Dom Carlos Filipe Ximenes Belo, SDB hato’o kumprimentus, hakoak bot, no votus selebrasaun k’manek ba maluk no belun tomak mak nam’kari iha Timor-Leste.*




Write a Facebook Comment

Hakerek ita nia komentariu uza account Facebook

View all comments

Write a comment

Loading....


Kanan - Iklan Sidebar

Lalatak Sosmed

Hare ami iha facebook, twitter, Instagram, Youtube para akompanha informasaun atual.