“Banhira alin sira hakarak sai jornalista ne’ebe diak no profisional, produz notísia bazeia ba faktus no dadus. Ezemplu bomba nakfera iha Libanon ne’e faktus, ema hira mak mate no sasan hira mak lakon ka rahun ne’e dadus,” hateten Alberico.
Deklarasaun ne’e hato’o hosi Diretor Diresaun Dezenvolvimentu no Analiza Média (DDAM) Alberico da Costa Junior iha sesaun enseramentu formasaun jornalistíka mak organiza hosi Core Magic Solutions, Lda (CMS).
Diretor DDAM reprezenta Konsellu Imprensa (KI) hodi aprezenta kode etika jornalístika ba foinsa’e sira iha formasaun refere. Iha sesaun ikus, Alberico salienta, jornalista tenke badinas estuda, lé no hakerek. Jornalista la hakerek, ne’e la’os jornalista.
Entretantu partisipante Basilio de Jesus Madeira akresenta, formasaun ne’e nu’udar pontu entrada ba nia atu hala’o knar jornalistíka. Kontinua pratika iha media online www.lalatak.com mak sei determina nia sai hakerek nain ne’ebé diak.
“Treinamentu ida ohin ne’e primera vez mai hau atu aprende iha mundu jornalismu ho nia lalaok sira, liu-liu materia prinsipal ne’ebe ita bele uza hakerek no lao tuir hanesan 5W1H, nomós kode etíka jornalístika nian,” Basilio hatutan.
Iha fatin hanesan, Deviana Vilanona Viegas Sarmento nu’udar mós partisipante hato’o, bainhira nia iha abilidade hakerek jornalístika diak, banati ba prinsipiu no kode etika jornalístika, nia hakarak foku ba asuntu polítika tanba ekivalenti ho ninia estudu.
“Servisu jornalítika ne’e laos hare deit ba areia ida maibe kobertura ba iha area hotu-hotu, ida mak polítika. Tanba ne’e hau iha interese boot hakarak sai jornalista ne’ebe foti notísia ho perspetiva politika,” tenik Deviana.
Formasaun ne’e hala’o iha Salaun Konferensia Centro Chega!, Antigu Komarka Balide, Dili, partisipa hosi foinsa’e na’in 25, kompostu hosi mane 18 no feto 7, Domingu (9/8/20).*
