Atu dezenvolve koñesimentu konaba étika, tékniku kobertura no oinsa hakerek nutísias tuir padraun jornalístika, Core Magic Solutions, Lda. (CMS), nain ba LALATAK.COM, koopera ho Konsellu Imprensa (KI) realiza formasaun jornalismu ba foinsaé sira, halao iha Dili, Domingo (9/8/20).
Atividade formasaun durante loron ida neé halao iha salaun konferensia Centro Chega! Balide, Dili, partisipa hosi foinsaé nain 25, fasilita hosi Diretur Divizaun Dezenvolvimentu no Analiza Mídia KI Alberico da Costa Junior no Metódio Caetano Moniz, Xefe Redasaun LALATAK.COM.
Iha ninia intervensaun ba sesaun abertura, Metódio esklarese portal nutísias online ida neé nudar espasu ba ema hotu-hotu, liu-liu foinsaé sira atu aprende no dezenvolve abilidade pessoal iha área jornalismu.
Iha sorin seluk, reprezentante KI Alberico da Costa Junior deklara katak prosesu aprendizajen neé diak tebes hodi foinsaé sira bele aprende atu sai jornalista neébe ho qualidade diak liu.
“Ami uluk mos aprende hotu hanesan imi, aprende barak liu husi maun senior sira. Sira hakerek nútisias kobre hotu valor nútisia no krítiku. Hau espere imi bele aprende barak liu tan ho lalatak, neébe involve maun senior sira balun,” akresenta Alberico ba partisipantes formasaun.
Diretur Dezenvolvimentu no Analiza Mídia ne’e mos aumenta katak ba oin KI sei serbisu hamutuk nafatin ho LALATAK.COM iha qualker asuntu neébe mak liga ho servisus jornalístiku ninian.
Iha fatin hanesan partisipante formasaun Rosiana M.D. Madeira sente orgullu bele hola parte iha atividade formasaun jornalismu neé.
“Hau sente kontente tebes tanba bele hetan oportunidade murak ida neé hodi hau bele hasaé liu tan hau nia koñesimentu iha area jornalístiku nian,” esklarese Rosiana.
Partisipante neé mos espera ba oin LALATAK.COM ho KI bele hametin tan kooperasaun hodi bele halao atividade formasaun barak liu tan ba foinsaé sira.
Atividade neé termina ho fahe sertifikadu apresiasaun ba partisipante formasaun sira.*
