BNCTL Oferese Kreditu ba Funsionarius Kontratadu

By Bebiana A.M. Soares | 5289 Views 11 Set 2020, 03:34:37 HTL Ekonomia
BNCTL Oferese Kreditu ba Funsionarius Kontratadu

Caption: Klientes Banco Nacional de Comércio de Timor-Leste (BNCTL) Dili, forma hodi hein atendimentu (Foto: www.adb.org).


Banco Nacional de Comércio de Timor-Leste (BNCTL) fasilita oportunidade ba funsionárius kontratadu sira, hosi instituisaun públiku ka privadu, asesu ba fasilidade kréditu hanaran Bukaé, ho valor impréstimus máximu US$10 Mil, funan 10% ho durasaun tempu tinan ida.

Lia hirak neé kasu hosi Geovanni da Costa Jong, Koordenador Area Jestaun Relasaun Kréditu, ne’ebe asumi mos kargu nudar Xefe Divizaun Kréditu Interinu BNCTL ba LALATAK.COM iha ninia knar fatin, Timor Plaza, Dili, Quarta-feira (9/9/20) semana neé.

“Produtu Bukaé ne’e ami fo ba tinan ida de’it, bele mos husu menus husi tinan ida. Ninia montante ne’e ba tinan ida maximu US$10 Mil,” Geovanni hateten.

Nutisias Relevantes:

Geovanni akresenta, kondisoens atu asesu ba fasilidade Kréditu Bukaé neé hare ba salariu hosi ema ne’ebe atu halo impréstimu (kliente), bazeia ba kontratu mak iha no assina ona ho sira nia instituisaun.

Kritériu seluk mak kliente tenki loke konta bankaria iha BNCTL, saláriu tenki transfere ba konta bankaria neé, labele kréditu iha fatin seluk, kartaun identidade, maibe la presiza parte seluk hodi fo sasin ba banku, Geovanni hatutan.

Koordenador Area Jestaun Relasaun Kréditu neé mos aumenta, durasaun tratamentu hodi hetan kréditu Bukaé ne’e kleur liu mak semana ida, tanba atu antedê kliente nia nesesidades urjenti, no la nesesita garantia riku-soin.

“Kréditu ne’e konsege lao ona iha tinan 2020 nia laran no Kréditu Bukaé ne’e laiha garantia ba riku-soin hanesan rai, no selseluk tan,” dehan Geovanni.

Nia esplika liu tan, Kréditu Bukaé neé mos kompleta ho mekanismu alternativa seluk, hanaran Seguru Kréditu ka Asuransi Kredit. Wainhira osan kréditu sai, banku koa hela kedas pursentu 1.25 hosi montante impréstimu, nudar seguru.

Ho mekanismu ida neé, osan funan neébe kliente sira sei selu mak 8.75% hosi total montante impréstimu.

“Ami oferese ho funan ne’e 10%, maibe ami mos iha tan produtu ida ne’ebe hanaran Seguru Kréditu. Se sosa ida ne’e, sei selu 1,25% no sei selu deit funan husi osan ne’ebe impresta 8,75%,” Giovanni esplika.

Nia informa, seguru kréditu ne’e uza hodi taka kliente ninia impréstimu iha banku bainhira hetan defisiênsia permanente, defisiênsia temporária ka moras, no bainhira lakon ninia servisus.

Se la uza seguru kréditu, kliente, ho kondisaun saída deit nafatin iha responsabilidade hodi selu osan impréstimu ho funan 10%. Se kliente mate, banku sei hare hosi benefísiu seluk mak instituisaun oferese ba ninia família, Geovanni afirma.

Alem de Kréditu Bukaé, BNCTL mos iha produtu kréditu seluk mak hanesan Kréditu Grupu, Kréditu Projetu, Kréditu Negosiu, Kréditu Investimentu, Kréditu Ass-wain/Veteranus, no selseluk tan.* | Editor: Metodio Caetano Moniz




Write a Facebook Comment

Hakerek ita nia komentariu uza account Facebook

View all comments

Write a comment

Loading....


Kanan - Iklan Sidebar

Lalatak Sosmed

Hare ami iha facebook, twitter, Instagram, Youtube para akompanha informasaun atual.