Aprosimasaun Lalian Tolu, Manufahi Menus Kazu Krime

By Metodio Caetano Moniz | 582 Views 02 Jun 2021, 07:58:43 HTL Sosial & Kultura
Aprosimasaun Lalian Tolu, Manufahi Menus Kazu Krime

Caption: Arantes Isaac Sarmento, Administrador Munisípiu Manufahi (Foto: dokumentasaun privadu).


Manufahi, munisipiu ne’ebe lokaliza iha zona sentral Timor-Leste ninian, iha parte sul hosi Dili ho distánsia (aérea) ± kilometrus 59, koñesida ho istoria funu hasoru kolonialismu nia ukun, hosi kedas éra Dom Boa Ventura, ne’ebe ninia estátua memorializasaun instala iha Luak, Same, nomos durante tempu okupasaun Indonesia.

Iha zona ida ne’e ham’rik metin foho Kablaki, nudar “sasin monok” no “monumentu memorial” ba sofrimentu no sakrifísiu Timor-Oan hirak ne’ebe luta hodi defende direitu ba ukun rasik-an. Kablaki mos nudar fortaleza forte hodi rezisti no sobreviviu hasoru funu-maluk Indonesia durante periodu konflitus, 1974 – 1999.

Iha fatin ida ne’e, durante tinan lima ikus, periódu 2016 – 2020, tuir dadus polísia ne’ebe públika iha sítiu www.pntl.tl, Manufahi sai hanesan munisípiu ne’ebe rejista kazu krime menus liu, so 234 ka 1.30% hosi total kazu 18,063, ki’ik liu kompara ho munisípius sira seluk iha teritoriu nasional.

Nutisias Relevantes:

Ida ne'e nudar rezultadu hosi kooperasaun servisus ne’ebe diak teb-tebes entre administrasaun munisípiu, administrasaun postu, polisia, autoridade suku, lider veteranus, juventude, nomos lider partidu polítiku sira hodi sensibiliza komunidade atu kria ambiente ne’ebe paz no hakmatek iha ida-idak nia hela fatin, informa Arantes Isaac Sarmento, Administrador Munisípiu Manufahi ba LALATAK.COM, Tersa-feira (01/06/21), via telefoni.

Arantes hatutan, sira mos aproveita atividades ne’ebe realiza hosi Governu ka parte seluk, bainhira fo tempu le’et oan ruma, hodi nafatin hato’o mensajen ba populasaun atu hametin paz no estabilidade, nomos kontribui ba prosesu dezenvolvimentu iha munisípiu ida ne’e.

Papel Igreja Katólika signifikante teb-tebes hodi hametin paz. Aleinde hamutuk ho autoridade munisipal ba halao programas sensibilizasaun, através misa, Amu-Lulik sira mos sempre fo hanoin ba sarani sira atu haburas situasaun trankuilidade iha ida-idak nia hela fatin, dehan Arantes.

Fator interesante seluk mak uza valores kulturais hodi rezolve problemas ne’ebe akontese iha munisípiu laran.

Durante ne’e, kuandu akontese dezintendimentu iha komunidade, ami iha "lali’an" tolu: Estadu, Igreja, no Kultura mak sempre koopera hamutuk, tun direkta ho komunidade hodi halo intervensaun no buka solusaun. Aprosimasaun ida ne’e efetivu hodi prevene no rezolve problemas iha munisípiu laran, akresenta Arantes Isaac Sarmento, ne’ebe nudar mos membru juradu organizasaun Resistência Nacional dos Estudantes de Timor-Leste, RENETIL.

“Tanba ida ne’e mak, rezultadu ne’ebe hatudu los duni, krime ne’ebe mak akontese iha Manufahi, klaru ke menus tanba iha kooperasaun ho entidade hotu-hotu iha Manufahi,” nia afirma.

Hatan ba pergunta oinsa uza valores kulturais hodi rezolve problemas? Arantes esplika, hanesan mos fatin sira seluk, maske hela nam’kari iha fat-fatin maibe ema ida-idak moris ho ninia lisan rasik, iha relasaun kulutral ba malu. Exemplu hanesan iha Same; suku Letefoho, Rotutu, Holarua, sira ne’e iha relasaun kultural. Tanba ne’e, kuandu akontese problema ami involve katuas lia-nain para uza tradisaun no valores kulturais hodi “hamate” problema refere.

Por ezemplu iha tinan 2006 bainhira mosu problema entre grupu joven sira, Arantes hatutan, ami bolu katuas lia-nain hosi lisan ida-idak mai halo seremonia kultural. Tuir tradisaun, ida-idak mama malus, ke’e rai-kuak depois tafui hamutuk iha ne’eba, nudar símbolu ida katak hotu-hotu hakribi.

Konaba tipu violensia no krime mak akontese iha Manufahi, Arantes informa katak maioria involve foinsa’e sira, ne'ebe baku malu tanba hemu lanu. Ida seluk, kauza hosi problema rai. Maibe, problema la sai boot tanba sempre iha intervensaun lalais hosi partes pertinentes.

“Iha Manufahi mos la akontese hahalok violensia no krime tanba diferensas polítikas no arte marsiais”, Arantes serteza.

Hosi Manufahi, hatudu momos katak valores kulturais no tradisaun Timor-Leste ninian la lakon no bele lao hamutuk ho produtu sivilizasaun hosi rai avansadu sira, nomos apropriadu no efetivu liu bainhira utiliza hodi responde ba exijénsia situasaun real iha ita nia rain.*




Write a Facebook Comment

Hakerek ita nia komentariu uza account Facebook

View all comments

Write a comment

Loading....


Kanan - Iklan Sidebar

Lalatak Sosmed

Hare ami iha facebook, twitter, Instagram, Youtube para akompanha informasaun atual.