APFTL Kondena Hahalok Violentu Hosi Membru PNTL

By Metodio Caetano Moniz | 990 Views 06 Jun 2021, 11:56:39 HTL Sosial & Kultura
APFTL Kondena Hahalok Violentu Hosi Membru PNTL

Caption: Prezidente APFTL Zaulino Gomes da Silva (klaran) halo konferensia imprensa konaba kazu PNTL tiru mate sidadaun iha Lahane Osidental, Dili (Foto: Dokumentasaun APFTL).


Relasiona ho aktu brutalismu ne’ebe prátika hosi membru PNTL hodi hamate sidadaun baibain nain rua no hakanek nain ida, iha Lahane Osidental, Dili, Sabado (05/06/2021), Alumni Parlamentu Foinsa’e Timor-Leste (APFTL) kondena hahalok violentu ne’e, nomos rekomenda ba Primeiru Ministru atu reforma instituisaun PNTL.

Sita hosi Komunikadu Imprensa APFTL mak haruka ba LALATAK.COM (06/06/2021), organizasaun foinsa’e ne’e hateten, la satisfas ho hahalok membrus PNTL ne’ebe kontinua kaer kroat Estadu nian hodi halakon sidadaun nia vida, saudozu Filomeno de Deus ho nia oan mane Camilo de Deus, nomos hakanek saudozu nia manefou Januario Pereira.

APFTL hateten, kazu hanesan ne’e laos foin akontese. Trajedia Kuluhun no asaun brutal sira seluk mak membru PNTL sira komete atu sai fali hanesan “tradisaun” iha instituisaun PNTL nia laran, ne’ebe la fo lisaun diak ba joven sira nu’udar fini ba futuru hodi lidera instituisaun PNTL.

Nutisias Relevantes:

Ho akontensimentu ida ne’e, APFTL rekomenda ba Primeiru Ministru Taur Matan Ruak, ne’ebe nudar mos Ministru Interior hodi reforma instituisaun PNTL, nomos husu Governu atu halo teste psikolojia ba membru PNTL para uza armas Estadu nian ho responsabilidade.

APFTL husu ba instituisaun PNTL toma responsabilidade ba família vítima hodi hetan justisa sosial, halais prosesu justisa hasoru membrus ne’ebe komete krime no violensia, nomos kontrola no regulariza arma sira, bandu membrus lori armas ba uma no movimenta tun/sa’e.

Iha parte ikus hosi komunikadu imprensa refere, APFTL hato’o sentidu kondolensia profunda ba familia enlutada no dezeju atu saudozu Filomeno de Deus ho nia oan mane Camilo de Deus deskansa ho hakmatek iha Kadunan Santu.*




Write a Facebook Comment

Hakerek ita nia komentariu uza account Facebook

View all comments

Write a comment

Loading....


Kanan - Iklan Sidebar

Lalatak Sosmed

Hare ami iha facebook, twitter, Instagram, Youtube para akompanha informasaun atual.

LALATAK ANTARAnews