Ameta, Hosi Raihenek Mota Comoro ba Milionariu

By Metodio Caetano Moniz | 952 Views 09 Jan 2021, 07:13:05 HTL Humaniora
Ameta, Hosi Raihenek Mota Comoro ba Milionariu

Caption: Mariano da Costa Alves, nain ba Cafe Organico Atsabe (Foto: Metodio Caetano Moniz | LALATAK.COM).


“Karáter sei la dezenvolvidu iha situasaun fasil no serenidade (ketenangan). Somente através esperiênsia provasoens tribulasoens (sofrimentu), mak ita nia alma fortelesida, vizoens klaras, ambisaun inspirada, no susesu alkansadu.” - Helen Keller.

Lia-fuan murak hosi Helen Keller neé nudar rezumu ka konkluzaun badak hosi Mariano da Costa Alves ninia história moris durante tinan 28, neébe forma hosi memória moruk, la dezista ba sofrimentu, hatur metin vizaun, labaruk atu aprende, no rekonsilia ho pasadu.

Hosi piñeira raihenek iha mota Comoro, Dili, nia, Mariano da Costa Alves, sempre bolu ho naran Ameta, laos deit sai foinsaé “milionáriu” ba ninia-an rasik através negosiu kafe, maibe kria mos kampu serbisu ba Timor-Oan nain atus ida resin, iha ninia sentru prosesamentu no laboratoriu kafe, iha Atsabe, Ermera.

Nutisias Relevantes:

Susesu ohin loron neébe foinsaé neé hetan, hahu bainhira iha tinan 2008 husik hela ninia k’nua hafoin akaba eskola pre-sekundaria iha Atsabe, Ermera, hodi kontinua estudus iha Eskola Sekundaria Finantil, Dili, tanba momentu neéba ladauk iha eskola sekundariu iha Atsabe.

Iha Dili, nia hela ho família balun hosi Ermera. Durante fulan tolu, nudar oan-kiak, inan mate iha tinan 2002 no aman dadur hela iha komarka, nia nunka kontribui “paun fuan ida” hodi sustenta moris iha família ida neé nia laran. Lia-fuan kroat no oin buis hosi uma-naín hafutar Ameta nia moris lorloron. Atu la hatodan família neé nia moris, nia deside sai, hodi ba hela iha lona azul nia okos, iha mota-laran, Comoro, ho ninia maluk sira seluk.

“Hau nia main mate iha 2002, no hau nia pai mos tama komarka, nia tama iha 2006. Entaun ida ne’e ita sente katak ita nia forsa ne’e laiha, neé mak mai hela ho família sira. Dalaruma iha ema balun hanoin katak ita hela ho ema hanesan família mai hela deit. Sempre iha hanoin, bainhira dadersan hau hola kafe karik, O tenke sosa paun ruma. Ho situasaun ida hanesan neé, entaun konsege sai hosi ne’eba,” Ameta salienta.

Durante tinan rua, nia hamahan-an iha lona okos. Dader-san deit Ameta tun ba mota laran, hisik kosar, halibur no piñeira rai-henek para hetan sentavus ruma, hodi sustenta nafatin moris no kontinua eskola. Sai hosi mota laran, iha meiudia, hamaran kosar para ba eskola. Siklu neé lao hanesan baibain, sai esperiênsia ba moris, hodi forma ninia pensamentu no atitude neébe maduru. Laiha biban atu lamenta no arepende ba lalaok moris.

Dalaruma kolegas sira hosi Atsabe mai vizita, hare nia situasaun sira dehan ba nia atu para tiha eskola no fila ba foho. Ameta la deziste! Hodi hatan ba sira katak nia sente livre liu hela no halao ninia moris iha mota laran, fatin neébe iha biban ba nia hodi moris hamutuk, halo interasaun no aprende ho ema seluk. Fatin neébe fo oportunidade ba nia hodi hetan netik rendimentu, maske labarak, dolar 16.00 kada semana, se badinas.

“Lae! Hau gosta liu hela iha ne’e duke hela ho ema seluk tanba iha neé maske osan laiha, maibe depende bai ta nia badinas. Momentu neé ema baku rai henek barak, hau gosta hamutuk ho sira. Maske laos hamutuk ho ema neébe ke eskola atu fo hanoin ita kona ba eskola nian, maibe ita bele hetan rendimentu oituan hosi fatin ne’ebe ita hela ba,” Ameta hateten.

Liu tiha tinan rua, tanba obriga bebeik, Ameta ho laran todan husik hela ninia maluk sira iha mota laran hodi ba hela iha tiun ida nia uma, iha Tasitolu. Hanoin hiás memória moruk momentu hela ho família seluk, Ameta hateten ba nia tiun, “hau hela ho ita diak mais mak ne’e, hau osan atu sosa hahan mak laiha.”

Durante hela ho ninia tiun, Ameta hahu kursu dalen Ingles iha Sols Liquiça, neébe ikus mai nia mos sai mestri, hodi hanorin hiás dalen Ingles ba foinsaé sira seluk iha fatin hanesan.

Iha tempu ida neé, foin mosu iha Ameta nia hanoin, ninia mehi. Nia inan-aman iha plantasaun kafe, iha Atsabe neéba mak abandona hela. Oinsa mak nia bele dezenvolve ida neé hodi fo moris, ba ninia-an rasik no ba ema seluk. Nuneé, nia aplika no konkore ba vaga barista iha Kafé Letefoho, Dili. Nia passa, no serbisu hamutuk ho maluk nain hat seluk. Liu deit fulan tolu, tanba hare ba ninia dezempeñu, nomeia nia sai Xefi Barista.

Loromatan saé dadaun ona, no fitun mos mutin ba dadaun. Determinasaun, humildade, no oportunidade hasoru ema laran luak sira, Kafé Letefoho ninia naín, konkretizasaun ba Ameta nia mehi so kestaun tempu. Sira haruka nia ba tuir treinamentu durante semana ida iha Denpasar, Bali, hodi aprende konaba oinsa prosesa kafe, oinsa meneira komunikasaun, no aprende konaba merkadu kafe nian. Fila hosi treinamentu Ameta habelar koñesimentu hirak ba ninia maluk sira seluk hodi dezenvolve liutan Kafé Letefoho.

Iha tinan 2015, Kafé Letefoho haruka Ameta ba tuir tan treinamentu fulan rua iha Japaun, aprende konaba kualidade kafe no, dala ida tan, kafe nia merkadu iha mundu. Momentu ida neé haforte liutan foinsaé neébe moris iha dia 4 Junho 1992 ninia determinasaun. Bainhira fila mai Timor, nia tenki loke fatin prosesamentu no faán kafe iha Atsabe.

“Momentu ne’e kedas fila mai too Timor hau fo hatene ba hau nia Diretur, se bele loke tan fatin Kafé Letefoho nian ne’e ida iha Atsabe. Diretur neé hatan mai hau, ita bot hatene prosesu ne’e, tanbasa mak ita boot rasik la halo para lori faan?” Ameta relembra.

Oan mane bot hosi Fernando da Costa Gomes no Filomena da Silva (matebian) konsidera lia-fuan neé hanesan dezafiu ida. Problema mak nia ladauk iha osan naton para hahu. Nuneé, iha fulan Outubro 2016 nia aplika no passa nudar seasonal workers iha Australia, durante fulan rua, neébe konsege hetan rendimentu $4,800.00. Fila mai Timor osan neé nia uza hodi sosa laptop, motorizada, no redi habai kafe para uza hodi hahu ninia negosiu.

Ameta rezigna-an hosi Kafé Letefoho no fila ba Atsabe. Nia husu ba nia aman, neébe sai ona hosi kadeia iha tinan 2014, para kuú dadaun sira nia kafe, labele faán ba ema seluk no halibur mos kafe hosi komunidade sira. Nia komesa hanorin sira konaba oinsa halo prosesamentu ba kafe para hetan kualidade diak, no oinsa packaging para atrai ema bele sosa. Prosesu hotu-hotu halo manual tanba ladauk iha mákina propriu. Ameta kontinua buka dalan ba promosaun, no hahu estabelese sentru prosesamentu kafe, iha Atsabe.

Graças a Deus, Timor-Oan balun funda dadaun Asosiasaun Kafe Timor. Ameta ba serbisu voluntáriu iha neéba, nudar maneira ida hodi promove dadaun ninia produtu. Atraves asosiasaun neé mos nia partisipa festival kafe mak realiza iha fatin oioin, neébe iha festival balun ninia produtu mak sai vensedor, hodi nia koñese peritu no espesialista kafe sira, tantu nasional ka internasional. Rede kooperasaun komesa luan. Ameta ninia espetativas aumenta, ninia produtu laos para serve faán iha rai-laran deit, maibe bele exporta ba rai seluk. Nia hetan parseiru ida hosi Nova Zelandia, neébe iha esperiensia konaba merkadu kafe internasional, nomos hatutan Ameta ho parseiru ida hosi Australia.

Iha tinan 2018, Ameta hahu exporta ninia produtu kafe ba parseiru hosi Australia neé kuaze tonelada ida, ho folin depende ba tipu kuaidade kafe. Tipu Fully Wash ho presu kada kilograma entre $4.50 - $5.00, kualiade Honey kada kilograma $6.00 - $7.00, no tipu Natural kuaze $7.00 - $8.00 kada kilograma. Iha tinan 2019 importador Australianu neé husu aumenta volume exportasaun, maibe tanba sentru prosesamentu ida deit, Ameta so bele exporta tonelada 19 (container ida). Iha tinan 2020 nia exporta tan container tolu ba Australia, Nova Zelandia, no Inglatera. Oras neé dadaun nia prepara hela atu exporta tan tonelada 380.

Hare ba volume exportasaun neébe aumenta tintinan no atu garante kualidade kafe, ho apoiu hosi MDF Ameta etabelese tan sentru prosesamentu ida seluk no laboratóriu kafe nian, nafatin iha Atsabe, hodi fo fatin serbisu ba funsionarius permanente nain tolu, no seasonal workes nain atus ida resin, neébe presiza gastus operasionais, inklui salariu kuaze $10,000.00 kada fulan.

Maske susesu tiha ona, Ameta nafatin moris simples, labaruk atu kontinua aprende, liu hosi treinamentu kurtu prazu konaba hasae kualidade kafe no marketing, neébe fasilita hosi Embaxada Nova Zelandia. Nia mos lahaluha kria relasaun diak ho kompañia kafe sira seluk hanesan NCBA, CCT, no Timor Global. Sira sempre azuda nia iha vida negosiu kafe nian, Ameta deklara.

Nudar fatin ba promosaun kafe, Ameta, laen hosi Flavia de Jesus no aman hosi oan feto nain ida neé hari kafetaria hanaran Cafe Organico Atsabe, lokaliza iha Fomento II, Comoro, Dili, ho menu oioin, neébe mos loke oportunidade ba foinsaé hirak neébe hakarak aprende konaba prosesamentu kafe no oinsa sai barista.

Ho susesu ida neé, oinsa relasaun ho família neébe uluk “duni” sai Ameta hosi sira nia uma? Responde ba pergunta neé, ho humildade nia hateten, “relasaun ho familia sira ne’ebe uluk hau hela hamutuk agora nafatin iha relasaun diak. Mai hau, hosi sira mak agora hau hanesan ne’e. Karik la hasoru situasaun sira hanesan ne’e, parese agora hau la hanesan ne’e. Hau tur hanoin fila fali, karik tanba momentu ne’e sira mos iha oan barak, ita mai hela laiha servisu, ita mai aumenta tan kanuru ida, kopu ida, no bikan ida, ne’e mak karik sai problema ba sira. Ho buat sira hanesan ne’e mak halo hau sai forsa no tahan iha situasaun saida deit.”

Antes remata dadalia ho LALATAK.COM, Mariano da Costa Alves husu ba foinsaé hirak neébe akaba ona estudus atu lalika lori Curriculum Vitae (CV) lao tun-saé buka serbisu. Fila ba ita nia rai fatin moris, uza matenek no esperiensia mak iha hodi kria rasik servisus para tulun fali ema seluk.

“Mai Dili para aprende deit, nuneé ba fali ita nia fatin moris hodi dezenvolve ita nia rain,” Ameta hakotu.

Lalaok moris hosi foinsaé Mariano da Costa Alves hanesan arkuiris, mosu momentu udan monu rai ho kores oioin. Maibe, ho kores hirak neé mak hamosu harmonia iha estétika nia laran, nakonu ho humildade no korajen hasoru dezafius, para sai kriativu no inovativu liu-tan, hanesan fraze neébe tatoli hosi Kahlil Gibran, ho dalen Indonésia: "Dari penderitaan telah muncul jiwa-jiwa terkuat; karakter yang paling masif dibakar dengan bekas luka."*


(Entrevista hosi Ekipa LALATAK.COM, dia 5 Janeiro 2021, iha Cafe Organico Atsabe, Fomento II, Comoro, Dili).





Write a Facebook Comment

Hakerek ita nia komentariu uza account Facebook

View all comments

Write a comment

Loading....


Kanan - Iklan Sidebar

Lalatak Sosmed

Hare ami iha facebook, twitter, Instagram, Youtube para akompanha informasaun atual.